Atalǵan marafon Nur-Sultan qalasynda alǵash ret ótkiziledi. Sharany elorda ákimdiginiń qoldaýymen «Astana jastary» jastar resýrstyq ortalyǵy jáne Tel-Aviv ýniversitetiniń dostar qaýymdastyǵy uiymdastyryp otyr.
Marafonǵa barlyǵy 7 komanda qatysady, ár topta 5 adamnan bolady. Jarys Nazarbaev Ýniversitetiniń Fab Lab innovatsiialyq klasterinde ótedi, onda qajetti tehnikalyq jáne materialdyq baza bar.
– Negizgi ideia jastar arasynda intellektýaldyq klasterdi damytý. Mundai meikatondar tehnologiiany damytýǵa jol beredi, bizdiń aldymyzda álemniń damyǵan 30 eliniń qataryna kirý mindeti turǵanyn eskersek, bul óte mańyzdy. Osyndai bastamalar arqyly maqsatymyzdaǵa jete alamyz, – dedi jastar ortalyǵynyń jetekshisi Shyńǵys Tileýlin.
Tel-Aviv ýniversitetiniń dostar qaýymdastyǵynyń vitse-prezidenti Sániia Arapovanyń sózinshe, atalǵan marafon múmkindigi shekteýli turǵyndardyń ómirin jaqsartýda zor mańyzǵa ie. «Bizdiń maqsatymyz jańa tehnologiialardy jasap, keiin ol tehnologiialardy óndiriske ainaldyratyn adamdardy tabý, iaǵni adamdardyń damýyna kómektesý», – dedi ol.
