Qaladaǵy kafelerdiń birinde tógilgen shaıdyń saldarynan janjal shyǵyp, oqıǵa kúsh qoldanýmen aıaqtalǵan. Bul týraly jábirlenýshi Lada.kz saıtyna aıtyp berdi. Oqıǵaǵa qatysty pikirdi Mańǵystaý oblystyq polısıa departamenti de usyndy, dep habarlaıdy Dalanews.kz.
Oqıǵa 2025 jylǵy 31 jeltoqsan keshke bolǵan. Jábirlenýshiniń aıtýynsha, ol kafede otyrǵan kezde shaıdy baıqamaı tógip alǵan. Osydan keıin mekeme ıesi jıhazdy hımıalyq tazalaýǵa ketetin aqshany birden tóleýdi talap etken.
Bul sát beınebaqylaý kamerasyna túsip qalǵan. Vıdeoda birneshe er adamnyń qyzǵa kúsh kórsetkeni kórinedi. Olar ony ıterip, ustap, shashynan súıregen. Oqıǵa kelýshilerdiń kózinshe bolǵan.
Jábirlenýshi shyǵyndy óteýden bas tartpaǵanyn aıtady.
«Men qarsy bolǵan joqpyn. Aǵama habarlasamyn, ol kelip, bárin sheshemiz dedim», - deıdi ol.
Alaıda onyń sózinshe, týysyn kútýge eshkim kelispegen. Janjal kezinde odan uıaly telefony, noýtbýgi jáne syrt kıimi salynǵan eki paket jeke zattary kúshpen tartyp alynǵan.
«Meni zattarymsyz, syrt kıimsiz kafeden qýyp shyǵardy. Kóshede júrgen adamdardan telefon suraýǵa týra keldi», - delingen onyń aryzynda.
Jábirlenýshi bul jaǵdaıda mekeme qyzmetkerleriniń áreketinen QR Qylmystyq kodeksindegi «Óz betinshe bılik etý» babynyń belgilerin kórip otyrǵanyn aıtady. Alaıda is tek qasaqana densaýlyqqa zıan keltirý deregi boıynsha tirkelgen. Sonymen qatar, kafe ıesi 2026 jylǵy 27 qańtarda qarsy aryz túsirgen.
Oqıǵaǵa qatysty túsinikteme bergen Mańǵystaý oblysynyń polısıa departamenti ókilderiniń málimetinshe, 31 jeltoqsanda kafe ákimshisi men kelýshi arasynda aldymen sózge kelý bolǵan. Keıin ol janjal tóbeleske ulasqan. Nátıjesinde eki tarap ta dene jaraqatyn alǵan.
2026 jylǵy 31 qańtarda istiń materıaldary sotqa joldanǵan.
Polısıa ókilderi qoǵamdyq oryndarda kúsh qoldanýǵa jol berilmeıtinin jáne mundaı áreketterge mindetti túrde quqyqtyq baǵa beriletinin aıtty.
