قالاداعى كافەلەردىڭ بىرىندە توگىلگەن شايدىڭ سالدارىنان جانجال شىعىپ، وقيعا كۇش قولدانۋمەن اياقتالعان. بۇل تۋرالى جابىرلەنۋشى Lada.kz سايتىنا ايتىپ بەردى. وقيعاعا قاتىستى پىكىردى ماڭعىستاۋ وبلىستىق پوليسيا دەپارتامەنتى دە ۇسىندى، دەپ حابارلايدى Dalanews.kz.

وقيعا 2025 جىلعى 31 جەلتوقسان كەشكە بولعان. جابىرلەنۋشىنىڭ ايتۋىنشا، ول كافەدە وتىرعان كەزدە شايدى بايقاماي توگىپ العان. وسىدان كەيىن مەكەمە يەسى جيھازدى حيميالىق تازالاۋعا كەتەتىن اقشانى بىردەن تولەۋدى تالاپ ەتكەن.

بۇل ءسات بەينەباقىلاۋ كامەراسىنا ءتۇسىپ قالعان. ۆيدەودا بىرنەشە ەر ادامنىڭ قىزعا كۇش كورسەتكەنى كورىنەدى. ولار ونى يتەرىپ، ۇستاپ، شاشىنان سۇيرەگەن. وقيعا كەلۋشىلەردىڭ كوزىنشە بولعان.

جابىرلەنۋشى شىعىندى وتەۋدەن باس تارتپاعانىن ايتادى.

«مەن قارسى بولعان جوقپىن. اعاما حابارلاسامىن، ول كەلىپ، ءبارىن شەشەمىز دەدىم»، - دەيدى ول.

الايدا ونىڭ سوزىنشە، تۋىسىن كۇتۋگە ەشكىم كەلىسپەگەن. جانجال كەزىندە ودان ۇيالى تەلەفونى، نوۋتبۋگى جانە سىرت كيىمى سالىنعان ەكى پاكەت جەكە زاتتارى كۇشپەن تارتىپ الىنعان.

«مەنى زاتتارىمسىز، سىرت كيىمسىز كافەدەن قۋىپ شىعاردى. كوشەدە جۇرگەن ادامداردان تەلەفون سۇراۋعا تۋرا كەلدى»، - دەلىنگەن ونىڭ ارىزىندا.

جابىرلەنۋشى بۇل جاعدايدا مەكەمە قىزمەتكەرلەرىنىڭ ارەكەتىنەن ق ر قىلمىستىق كودەكسىندەگى «ءوز بەتىنشە بيلىك ەتۋ» بابىنىڭ بەلگىلەرىن كورىپ وتىرعانىن ايتادى. الايدا ءىس تەك قاساقانا دەنساۋلىققا زيان كەلتىرۋ دەرەگى بويىنشا تىركەلگەن. سونىمەن قاتار، كافە يەسى 2026 جىلعى 27 قاڭتاردا قارسى ارىز تۇسىرگەن.

وقيعاعا قاتىستى تۇسىنىكتەمە بەرگەن ماڭعىستاۋ وبلىسىنىڭ پوليسيا دەپارتامەنتى وكىلدەرىنىڭ مالىمەتىنشە، 31 جەلتوقساندا كافە اكىمشىسى مەن كەلۋشى اراسىندا الدىمەن سوزگە كەلۋ بولعان. كەيىن ول جانجال توبەلەسكە ۇلاسقان. ناتيجەسىندە ەكى تاراپ تا دەنە جاراقاتىن العان.

2026 جىلعى 31 قاڭتاردا ءىستىڭ ماتەريالدارى سوتقا جولدانعان.

پوليسيا وكىلدەرى قوعامدىق ورىنداردا كۇش قولدانۋعا جول بەرىلمەيتىنىن جانە مۇنداي ارەكەتتەرگە مىندەتتى تۇردە قۇقىقتىق باعا بەرىلەتىنىن ايتتى.