Petropavldaǵy «Sultan» makaron fabrikasynda 35 jastaǵy jumysshy óndiristik qurylǵynyń ishine túsip ketip, oqiǵa ornynda kóz jumdy, dep habarlaidy dalanews.kz.
Soltústik Qazaqstan oblystyq politsiia departamentiniń málimetinshe, qaiǵyly oqiǵa 12 qazanda Petropavldaǵy Trýd kóshesi boiyndaǵy óndiris nysandarynyń birinde bolǵan. Politsiia jazataiym oqiǵanyń mán-jaiyn anyqtap jatyr.
Quqyq qorǵaý organdary adam ólimine ákep soqqan eńbekti qorǵaý qaǵidalaryn buzý faktisi boiynsha qylmystyq is qozǵady. Tergeý barysynda oqiǵanyń naqty qalai bolǵany jáne oǵan kim jaýapty ekeni anyqtalmaq.
Petropavlovsk.news basylymynyń habarlaýynsha, oqiǵa «Sultan» makaron fabrikasynda bolǵan. Aldyn ala málimet boiynsha, qamyr ileitin qurylǵyny tazalaý kezinde jumysshy onyń ishine túsip ketip, aýyr jaraqat alǵan. Derekkózdiń málimetinshe, ol osy óndiris ornynda kóp jyldan beri eńbek etken.
Oqiǵaǵa qatysty túpkilikti qorytyndy tergeý nátijesinde jasalady. Ázirge jumysshynyń ólimine ákelgen jaǵdailar men jaýapty tulǵalar týraly resmi tolyq aqparat jariialanǵan joq.
Aita keteiik, 2026 jyldyń shildesinde Aqtogai Milk kásipornynyń aýmaǵyndaǵy káriz qudyǵynda jumys júrgizý kezinde alty adam qaza tapqan. Aldyn ala málimet boiynsha, olar elektr sorǵysyn jóndegen. Qaza bolǵandardyń eń kishisi 16 jasta bolǵan, taǵy bir er adam kómirqyshqyl gazynan ýlanyp, aýrýhanaǵa jetkizilgen.
Keiin arnaiy komissiia jumys berýshiniń kinási 100 paiyz ekenin anyqtaǵan. Atap aitqanda, qaýipti jumystardy qaýipsiz oryndaýǵa qajetti oqytýdyń júrgizilmeýi jáne jeke qorǵanys quraldarynyń bolmaýy siiaqty buzýshylyqtar anyqtalǵan.
