Qazaqstanda boryshkerlerge orynsyz ýaqytta jáne shamadan tys jii qońyraý shalatyn kollektorlyq agenttikter tizilimnen shyǵarylyp, naryqtan ketýi múmkin, al lombardtardyń nesie berý talaptary men tutynýshylardyń quqyqtaryn saqtaý tártibi tekseriledi, dep habarlaidy dalanews.kz.
Qarjy naryǵyn retteý jáne damytý agenttiginiń tóraiymy Madina Ábilqasymovanyń aitýynsha, kollektorlardyń jumysynda zań talaptaryn buzý jaǵdailary áli de kezdesedi. Olardyń qatarynda boryshkerlerge belgilenbegen ýaqytta qońyraý shalý, ruqsat etilgen jiilikten asyp ketý, sondai-aq adamnyń jumys ornyna nemese dostaryna habarlasý bar. Bul týraly LS basylymy habarlady.
Agenttik basshysynyń málimetinshe, problemalyq tutynýshylyq nesielerdiń kóbeiýine bailanysty kollektorlardyń qyzmetine qatysty azamattardan túsetin shaǵymdar da artqan. Osyǵan bailanysty retteýshi olardyń qyzmetine qoiylatyn talaptardy kúsheitýge baǵyttalǵan túzetýler ázirlegen. Qazir kollektorlyq agenttikterdiń jumysyna qatysty tekserýler júrgizilip jatyr.
Talaptardy buzǵany anyqtalǵan josyqsyz agenttikter tizilimnen shyǵarylýy múmkin. Mundai jaǵdaida olar kollektorlyq qyzmetpen ainalysý quqyǵynan aiyrylady.
Lombardtar da tekseriledi
ARRFR lombardtardyń qyzmetine de nazar aýdarǵan. Buǵan qysqa merzimdi qaryz beretin keibir kompaniialar naryǵyndaǵy ózgeristerden keiin klientterdiń lombardtarǵa kóbirek júgine bastaýy sebep bolǵan.
Ábilqasymovanyń aitýynsha, lombardtardyń nesie berý sharttary men tutynýshylardyń quqyqtaryn qorǵaý talaptaryn kúsheitý josparlanyp otyr. Alǵashqy kezeńde agenttik olardyń borysh júktemesiniń koeffitsientine, paiyzdyq mólsherlemelerge qatysty zań talaptaryn saqtaýyn jáne azamattardyń shaǵymdaryn qaraý tártibin tekseredi.
Kollektorlar qandai erejelerdi saqtaýy kerek?
ARRFR-diń resmi túsindirmesine sáikes, kollektorlar jumys kúnderi saǵat 08:00-den 21:00-ge deiin ǵana qońyraý shala alady. Qońyraýlardyń jiiligi aptasyna úsh retten aspaýǵa tiis. Sonymen qatar olar boryshkerdi qorqytýǵa, qorlaýǵa, jańylystyrýǵa nemese onyń bedeline nuqsan keltiretin málimetterdi taratýǵa quqyly emes.
Azamattar kollektorlardyń áreketin zańsyz dep eseptese, Qarjy naryǵyn retteý jáne damytý agenttigine shaǵym túsire alady. Mundai jaǵdaida qońyraýlardyń jazbalary men ózge de dálelderdi saqtaý shaǵymdy qaraý kezinde mańyzdy bolýy múmkin.
Qazirgi ýaqytta kollektorlar men lombardtarǵa qatysty talaptardy kúsheitý jumystary jalǵasyp jatyr. Naqty qandai agenttikterdiń tizilimnen shyǵarylatyny jáne lombardtarǵa qandai qosymsha shekteýler engiziletini tekserýler men retteýshiniń keiingi sheshimderinen soń belgili bolady.
