Resei saiasatkeri Ziýganov: "Soltústik Qazaqstan tutastai alǵanda orystiki, al ońtústik Qazaqstanda orys tili mektepterde oqytylmaýda. Memlekettik Dýma bul máseleni sheshý boiynsha naqty sheshimder shyǵarýy tiis dep sanaimyn", – dep byqsyǵan bolatyn.
Dýma depýtatynyń aitýynsha Qazaqstandaǵy orystildilerge osyndaǵy ultshyldar kún kórsetpeýde. "Biz rýhani, mádeni, tildik turǵydan tolyq qorǵalýǵa tiis sharalar qabyldaýǵa mindettimiz", - deidi tórinen kóri jaqyn Ziýganov.
Májilis depýtaty Aigúl Quspan kári kommýnisti soqtyǵarǵa sebep tappai júr dep sanaidy.
"Tyrnaq astynan kir izdep, qisynǵa kelmeitin, oidan quraǵan dúnieni daýǵa ulastyrmaqshy. "Soltústik Qazaqstan tutastai alǵanda orystiki, al ońtústik Qazaqstanda orys tili mektepterde oqytylmaýda" degenin basqasha túsindirý múmkin emes.
Resei biligin shuǵyl shara qabyldaýǵa shaqyrýy da ashyqtan-ashyq arandatý. Aitylǵan sóz - atylǵan joq.
Shovinistik úndeý jasaǵan Ziýganov Qazaqstan men Reseidiń senimdi seriktes, odan qaldy odaqtas ekenin umytyp ketse kerek.
Kommýnistik partiianyń kósemi ózin alys-jaqyn sheteldegi orystardyń janashyry, ult patrioty retinde dáriptegisi kelgendei. Mundai málimdeme arqyly Ziýganov sekildi saiasatkerler Reseidiń súikimin ketirýde. El men eldi arazdastyrýda", – deidi Quspan.
Onyń atap ótkenindei, qazirgidei qubylmaly ýaqytta resei saiasatkerleri eń aldymen tilin tyiýy qajet.
"Ásirese, kórshilerine kelgende aýyzdan shyqqan ár sózge abai bolǵan jón", – deidi depýtat.
