Saiystyń maqsaty – memlekettik tildiń qoldanylý aiasyn keńeitip, memlekettik basqarý tili retindegi rólin nyǵaitý. Baiqaýdy Túrkistan oblysy mádeniet basqarmasynyń basshysy Ázimhan Qoilybaev ashyp, til saiysynyń mańyzdylyǵyna keńinen toqtalyp, baiqaý qatysýshylaryna sáttilik tiledi.
Sondai-aq ol saiysty uiymdastyrýshylarǵa alǵysyn bildirdi.
– Qurmetti jarysqa qatysýshylar, qala qonaqtary! Qazaq rýhaniiatynyń altyn besigi, ulttyq qundylyqtardyń qazynaly dińgegi Túrkistan óńirine qosh keldińizder! Búgingi til saiysynyń túrki halyqtarynyń rýhani astanasy – Túrkistan tórinde ótýiniń ózinde tereń mán bar. Til – qazaqtyń bailyǵy, til – ulttyń jany. Sondyqtan tilimizdi dáripteý, qurmetteý bizdiń basty paryzymyz. Endeshe búgingi saiysta baq synaǵaly kelip otyrǵan barshańyzǵa sáttilik serik bolsyn, – dedi Ázimhan Serikuly.
Jalpy baiqaý bes kezeńnen turady. Atalǵan kezeńnen súrinbei ótkender aqtyq synda ózara myqtyny anyqtaidy. Jarys qorytyndysy keshki 18:00-de anyqtalyp, jeńimpazdar marapattalyp, olarǵa syi-siiapat tabystalmaq.
Aita keteiik, Túrkistan oblysynda Qazaqstan Respýblikasynda til saiasatyn iske asyrýdyń 2020-2025 jyldarǵa arnalǵan memlekettik baǵdarlamasyn iske asyrýdaǵy 2020-2025 jyldarǵa arnalǵan is-sharalar jospary bekitilip, tiisti jumystar atqarylýda.
Oblysta 16 aýdandyq, qalalyq tilderdi oqytý ortalyqtary bar. Ortalyqtarda 15 ádisker, 30 qazaq tili, 18 orys tili, 24 aǵylshyn tili mamany jumys isteidi.
Tilderdi oqytý ortalyqtarynda 2020 jyly 4042 adam memlekettik tildi úirenip shyqsa, onyń ishinde 1071 adam ózge etnos ókilderi. Al, 2021 jyldyń 8 aiynyń qorytyndysy boiynsha oqytý ortalyqtarynda jalpy sany 4653 adam til meńgerip shyqqan. Oblysta memlekettik tildi meńgergen etnos ókilderiniń úlesi 69,5 paiyzdy quraidy.
