سايىستىڭ ماقساتى – مەملەكەتتىك ءتىلدىڭ قولدانىلۋ اياسىن كەڭەيتىپ، مەملەكەتتىك باسقارۋ ءتىلى رەتىندەگى ءرولىن نىعايتۋ. بايقاۋدى تۇركىستان وبلىسى مادەنيەت باسقارماسىنىڭ باسشىسى ءازىمحان قويلىبايەۆ اشىپ، ءتىل سايىسىنىڭ ماڭىزدىلىعىنا كەڭىنەن توقتالىپ، بايقاۋ قاتىسۋشىلارىنا ساتتىلىك تىلەدى.
سونداي-اق ول سايىستى ۇيىمداستىرۋشىلارعا العىسىن ءبىلدىردى.
– قۇرمەتتى جارىسقا قاتىسۋشىلار، قالا قوناقتارى! قازاق رۋحانياتىنىڭ التىن بەسىگى، ۇلتتىق قۇندىلىقتاردىڭ قازىنالى دىڭگەگى تۇركىستان وڭىرىنە قوش كەلدىڭىزدەر! بۇگىنگى ءتىل سايىسىنىڭ تۇركى حالىقتارىنىڭ رۋحاني استاناسى – تۇركىستان تورىندە ءوتۋىنىڭ وزىندە تەرەڭ ءمان بار. ءتىل – قازاقتىڭ بايلىعى، ءتىل – ۇلتتىڭ جانى. سوندىقتان ءتىلىمىزدى دارىپتەۋ، قۇرمەتتەۋ ءبىزدىڭ باستى پارىزىمىز. ەندەشە بۇگىنگى سايىستا ب ا ق سىناعالى كەلىپ وتىرعان بارشاڭىزعا ساتتىلىك سەرىك بولسىن، – دەدى ءازىمحان سەرىك ۇلى.
جالپى بايقاۋ بەس كەزەڭنەن تۇرادى. اتالعان كەزەڭنەن سۇرىنبەي وتكەندەر اقتىق سىندا ءوزارا مىقتىنى انىقتايدى. جارىس قورىتىندىسى كەشكى 18:00-دە انىقتالىپ، جەڭىمپازدار ماراپاتتالىپ، ولارعا سىي-سياپات تابىستالماق.
ايتا كەتەيىك، تۇركىستان وبلىسىندا قازاقستان رەسپۋبليكاسىندا ءتىل ساياساتىن ىسكە اسىرۋدىڭ 2020-2025 جىلدارعا ارنالعان مەملەكەتتىك باعدارلاماسىن ىسكە اسىرۋداعى 2020-2025 جىلدارعا ارنالعان ءىس-شارالار جوسپارى بەكىتىلىپ، ءتيىستى جۇمىستار اتقارىلۋدا.
وبلىستا 16 اۋداندىق، قالالىق تىلدەردى وقىتۋ ورتالىقتارى بار. ورتالىقتاردا 15 ادىسكەر، 30 قازاق ءتىلى، 18 ورىس ءتىلى، 24 اعىلشىن ءتىلى مامانى جۇمىس ىستەيدى.
تىلدەردى وقىتۋ ورتالىقتارىندا 2020 جىلى 4042 ادام مەملەكەتتىك ءتىلدى ۇيرەنىپ شىقسا، ونىڭ ىشىندە 1071 ادام وزگە ەتنوس وكىلدەرى. ال، 2021 جىلدىڭ 8 ايىنىڭ قورىتىندىسى بويىنشا وقىتۋ ورتالىقتارىندا جالپى سانى 4653 ادام ءتىل مەڭگەرىپ شىققان. وبلىستا مەملەكەتتىك ءتىلدى مەڭگەرگەن ەتنوس وكىلدەرىنىڭ ۇلەسى 69،5 پايىزدى قۇرايدى.
