Talǵar ákimi Arystanbek Ábilqaiyruly halyqpen tildesýdiń jańa formatyna kóshken, ákimniń videolary jelide kóp qaralym jinap jatyr, – dep habarlaidy Dalanews.kz.
Qala basshysy "akim_goroda_talgar" ataýymen jelidegi paraqshasyn belsendi júrgizedi. TikTok jelisinde 30 myńǵa jýyq oqyrman jinaǵan, al videolarynyń qaralymy birneshe júz myńnan asyp ketedi. Arystanbek Ábilqaiyruly jelide turǵyndardyń suraqtaryna jaýap berip, tipti bir azamatty úiine izdep kelgen.
Qala turǵyndarynyń biri ózi turatyn kóshe las ekenin aityp shaǵymdanǵan. "Levitana kóshesin kórshi, qandai las?!" degen turǵynnyń suraǵyna ákim bylai jaýap qatqan:
"Mars, kele jatyrmyn, qarsy al. Úidesiń be? Shyq. Qazir Levitana kóshesine kelemiz. Bes minýtta bolamyn", - deidi ákim videoda.
Ákimdi qonaqqa shaqyrǵan talǵarlyq úiinde joq bolyp shyqty, ol ákimniń videosyna "men jumystamyn ǵoi" dep jazyp jibergen.
"Mars, senikine kelip turmyn. Kósheniń aǵashyn, tazalyǵyn kórip otyrmyn. Ýaqytyń bolǵan kezde kelemiz", - deidi ákim.
Tengrinews.kz-ke bergen suhbatynda ákim álemjelidegi belsendiligin túsindiripti. Ákim áleýmettik jelide mundai tanymaldylyqqa áli úirenbegen, biraq bul oǵan kúndelikti jumysyn halyqpen bólisýge múmkindik beretinin jetkizdi.
"Paraqshany alǵash ashqan kezde tanystarymnan 36 adam boldy. Keiin adamdar aqyryndap qosyla bastady, al keiingi eki aptada kóp tirkeldi. Halyqtyń shaǵymdaryna ýaqytynda jaýap berilse, qalada shielenis bolmaidy dep oilaimyn", - deidi ol.
Ákimge kontent boiynsha SMM-menedjer kómektesedi eken. Qala basshysynyń sózinshe, bul sonyń ideiasy bolǵan.
Arystanbek Ábilqaiyruly týraly ne belgili?
Ol 1983 jyly dúniege kelgen. Mamandyǵy - ekolog.
- 2005-2006 jyldar aralyǵynda «MAG group» qurylys kompaniiasynda eńbek jolyn bastaǵan;
- 2006-2009 jyldar aralyǵynda Úkimettik tájiribelik sharýashylyǵynda direktor kómekshisi qyzmetin atqarǵan;
- 2009-2023 jyldar aralyǵynda Talǵar qalasyndaǵy «Marat» óndiristik kooperativinde damý menedjeri bolyp, osy kásiporynnyń orynbasary laýazymyna deiin kóterilgen;
- 2023 jyldan bastap «Talǵar turǵyn úi» jaýapkershiligi shekteýli seriktestiginiń bas direktory qyzmetin atqarǵan.
- 2024 jyly 18 jeltoqsannan bastap qazirge deiin Talǵar qalasynyń ákimi.
