Astanada kópqabatty turǵyn úidiń baspaldaq alańynda qoǵamdyq tártipti buzǵan er adam 10 táýlikke ákimshilik qamaqqa alyndy, dep habarlaidy dalanews.kz.
Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń málimetinshe, J. esimdi azamat turǵyn úidiń baspaldaq alańynda turyp, kireberis terezesinen kóshege qarai kishi dáret syndyrǵan.
Oqiǵa áleýmettik jelilerde taraǵan beinejazbaǵa túsip, keiin sotta qaralǵan.
Sot otyrysynda er adam kinásin moiyndap, jasaǵan áreketine ókingen. Onyń kinási is materialdary jáne beinejazba arqyly dáleldendi.
Sot J.-ny QR Ákimshilik quqyq buzýshylyq týraly kodeksiniń 434-baby 1-bóligi boiynsha kináli dep tanydy. Bul bap usaq buzaqylyq, iaǵni qoǵamdyq tártipti buzyp, ainaladaǵylarǵa qurmetsizdik tanytatyn áreketter úshin jaýapkershilikti kózdeidi.
Atalǵan bap boiynsha 20 AEK mólsherinde aiyppul salý, 20-dan 60 saǵatqa deiin qoǵamdyq jumystarǵa tartý nemese 5-ten 15 táýlikke deiin ákimshilik qamaqqa alý qarastyrylǵan.
Jaza taǵaiyndaý kezinde sot quqyq buzýshylyqtyń sipatyn, azamattyń qoǵamdyq tártipke degen qurmetsizdigin jáne oqiǵanyń áleýmettik jelilerde keń taralǵanyn eskergen.
Nátijesinde er adamǵa 10 táýlik ákimshilik qamaq taǵaiyndaldy.
Sot qaýlysy ázirge zańdy kúshine engen joq.
