Jańa mektepte oqýshylar jalpy oqý baǵdarlamasy boiynsha bilim alyp qana qoimai, sonymen birge ózderiniń shyǵarmashylyq qabiletterin de damytýǵa múmkindik alady. Ǵimaratta keramika, metall men aǵash óńdeý sheberhanalaryna, matalardy óńdeýge, tamaq daiyndaýǵa arnaiy oryn bólingen jáne olar tolyqtai jabdyqtalǵan.
– Búgingi kún jylyoilyqtar úshin óte mańyzdy bolmaq. Sebebi, Qazaqstan Respbýlikasy Táýelsizdiginiń 30 jyldyǵy aiasynda búgin kópten kútken bilim ordasy №6 jalpy mekteptiń jańa ǵimaratynyń qurylysy tolyqtai aiaqtalyp, halyq igiligine tabys etiledi. Osyǵan orai sizderdi jańa oqý jylynda jańa mekteptiń ashylý saltanatymen shyn júrekten quttyqtaimyn! Oqýshylarǵa osyndai múmkinshilikterdi týdyra otyryp, jaqsy oqyp, belsendi jáne qairatty, adal jáne jaýapty bolýyn tileimin, – dedi Halel Jamalov, Atyraý oblysy Jylyoi aýdanynyń ákimi.
«Teńizshevroil» JShS Jylyoi aýdany men Qulsary qalasynyń damýyna erekshe nazar aýdarady. TShO-nyń úkimetpen jáne jurtshylyqpen bailanys bóliminiń bas menedjeri Rzabek Artyǵalievtiń aitýynsha, «Igilik» baǵdarlamasy boiynsha júzege asyrylǵan barlyq jobalardyń shamamen 60 paiyzy Jylyoi aýdanyna tiesili.
– Biz kompaniia retinde de, qyzmetker retinde de jergilikti qoǵamdastyqtyń ajyramas bóligi bolyp tabylamyz. TShO basshylyǵy úshin Jylyoi aýdany qashan da basty nazarda. Óitkeni Teńiz kenishinde jumys isteitinderdiń basym bóligi osy jerde turady. Biz «Igilik» baǵdarlamasynyń kezekti jobasynyń tabysty aiaqtalǵanyna jáne Qulsary qalasy turǵyndaryna qyzmet etetinine qýanyshtymyz. Bolashaqta osy mektep túlekteriniń tabystaryn sizdermen birge kóreiik, – dedi ashylý saltanatynda sóz alǵan Rzabek Artyǵaliev.
Búginde 63 myńǵa jýyq turǵyny bar Qulsary qalasynda 13 jalpy bilim berý mekemesi jumys isteidi. Bes jyldyq «Atyraý Bonýs qory» baǵdarlamasyn almastyrǵan «Igilik» erikti áleýmettik infraqurylymdyq jobalar baǵdarlamasy óz jumysyn 1998 jyly bastady.
Sodan beri «Igilik» baǵdarlamasynyń jyldyq biýdjeti satylap kóbeiip keledi. Máselen, 2021 jyly 30 million AQSh dollaryn bóldi. Qarajattyń negizgi bóligi balabaqshalar, mektepter jáne Atyraý oblysy turǵyndarynyń igiligine arnalǵan basqa da áleýmettik nysandardyń qurylysyna baǵyttalatyn bolady. «Igilik» baǵdarlamasy boiynsha 130-dan astam joba júzege asyryldy.
