Ulttyq Banktiń málimetinshe, qańtar aiynyń qorytyndysy boiynsha teńge baǵamy 1 AQSh dollary úshin 518,2 teńgege deiin 1,3%-ǵa nyǵaidy. Qazaqstan qor birjasyndaǵy saýda-sattyqtyń ortasha kúndik kólemi bir aida 254 mln AQSh dollarynan 227 mln AQSh dollaryna deiin tómendedi. Saýda-sattyqtyń jalpy kólemi 4,5 mlrd AQSh dollaryn qurady, dep jazady Dalanews.kz.
"Qańtar aiynda Ulttyq qordan 850 mln AQSh dollaryna valiýta satyldy. Bul respýblikalyq biýdjetke transfertter bólýge, sondai-aq "Taldyqorǵan-Úsharal" magistraldyq gaz qubyryn salýǵa baǵyttalǵan infraqurylymdyq jobany qarjylandyrýǵa múmkindik berdi. Ulttyq qordan satý úlesi jalpy saýda-sattyq kóleminiń 19%-yn nemese kúnine shamamen 43 mln AQSh dollaryn qurady", delingen habarlamada.
Ulttyq Bank Ulttyq qordyń qarajatymen operatsiialar júrgizý kezinde naryqtyq beitarap qaǵidatyn saqtaidy. Bul shetel valiýtasyn udaiy jáne birkelki satýdy bildiredi.
Sondai-aq Ulttyq Bank Úkimettiń aldyn ala boljamdy ótinimderi boiynsha respýblikalyq biýdjetke transfert bólýge aqpanda Ulttyq qordan 550 mln AQSh dollarynan 650 mln AQSh dollaryna deiingi mólsherde valiýta satylady dep kútedi.
Ulttyq Bank qańtarda zeinetaqy aktivteriniń investitsiialyq portfeline AQSh dollaryn satyp alǵan joq. Aqpanda da BJZQ-ǵa valiýta satyp alý josparlanbaidy.
Qańtar aiynda Ulttyq Bank otandyq altyn óndirýshi kásiporyndardan buryn satyp alynǵan altyndy satýdan túsken AQSh dollaryn ishki valiýta naryǵynda satý kózdeletin teńestirý tetigin endirýge sheshim qabyldady.
"Osy sheshim aiasynda qańtarda 244 mlrd teńge azaityldy. Aqpanda osy maqsatta balamasynda shamamen 250 mlrd teńge kóleminde valiýta satý kútiledi", - deidi Ulttyq Bank.
Buǵan deiin 2024 jyldyń tórtinshi toqsanynda affinajdalǵan altyndy tepe-teń satyp alý úshin Ulttyq Bank 2025 jylǵy birinshi toqsan ishinde shamamen 750 mlrd teńgege shetel valiýtasyn satatyny habarlanǵan.
