Qazaq beineleý óneriniń kórnekti ókili, Qazaqstannyń eńbek sińirgen qairatkeri, Memlekettik syilyqtyń laýreaty, professor Aǵymsaly Dúzelhanuly Dúzelhanov dúnieden ozdy, dep habarlaidy Dalanews.kz.
Qaraly habarmen QR Mádeniet jáne aqparat ministrligi bólisip, Aǵymsaly Dúzelhanulynyń mezgilsiz dúnieden ótýine bailanysty orny tolmas qazaǵa ortaqtasyp, otbasy men týǵan-týystaryna, týǵan halqyna qaiǵyryp kóńil aitady.
"Aǵymsaly Dúzelhanuly – beineleý ónerinde ózindik qoltańbasymen daralanǵan biregei sýretshi. Ol shyǵarmalary arqyly halqymyzdyń rýhyn, zamana tynysyn aishyqtap, ulttyq ónerimizdiń kókjiegin keńeite tústi. Urpaq tárbiesine de ólsheýsiz eńbek sińirip, talai jas sýretshiniń kásibi jolyn aiqyndaýyna jol ashty. Ómirden ozǵanyna qaramastan, onyń mol murasy men jarqyn beinesi halqymyzdyń júreginde máńgilik saqtalady. Marqumnyń jany jánnatta, imany salamat bolsyn", delingen ministrliktiń kóńil aitý habarynda.
Aǵymsaly Dúzelhanov 1951 jyly 19 tamyzda Qyzylorda oblysynyń Qazaly qalasynda dúniege kelgen. 1976 jyly Almaty kórkemsýret ýchilishesin, 1982 jyly V.I. Sýrikov atyndaǵy Máskeý kórkemsýret institýtyn bitirgen. Qoldanbaly grafika, plakat, kitap bezendirý, keskindeme, portret janrlary boiynsha eńbek etken.
Tarihi, folklorlyq taqyryptaǵy jáne balalarǵa arnalǵan 200-den astam kitapty bezendirgen. "Altyn sarbaz", "Túrkistan", "Ordabasy", "Oǵyz han", "Kóroǵly" jáne t.b. keskindeme týyndylarynyń, sondai-aq Abylai han, Ábilqaiyr han, Qazybek bi, Áiteke bi, Tóle bi, Qorqyt jáne t.b. portretter seriiasynyń avtory.
Sýretshiniń týyndylary Qazaqstannyń jáne shet elderdiń óner murajailaryna qoiylǵan.
