Almatyda qaitys bolǵan 12 jastaǵy balaǵa qatysty jańa málimet jariialandy. Marqumnyń ájesi jýrnalist Rýslan Ótepbaiǵa suhbat berip, oqiǵanyń otbasy úshin aýyr soqqy bolǵanyn aitty, dep habarlaidy dalanews.kz.
Áiel nemeresiniń ólimine qatysty kúdikti áreketin túsine almaitynyn jetkizip, kóz jasyna erik bergen.
"Qylmyskerdi 15 paiyz ǵana túsinemin. Nemeremdi janýardy óltirgendei pyshaqtap tastaǵan. 6-synyptyń qyzy ekeýin tóbelestirip qarap otyrǵan. Ol áli kishkentai qyz ǵoi, sabaq oqýy kerek. Qylmysker bala "men seni bylai jeńbesem, basqasha jeńem" dep óltirgen siiaqty", – dedi marqumnyń ájesi.
Rýslan Ótepbai bul oqiǵaǵa arnalǵan baǵdarlamanyń tolyq nusqasy búgin jariialanatynyn habarlady. Jýrnalist jazbasynda 12 jastaǵy balanyń ólimine kim kináli ekeni, kúdiktilerdiń ne aitqany jáne balalar psihikasyna qandai oiyndar qaýipti bolýy múmkin degen suraqtar kóteriletinin atap ótti.
Belgili bolǵandai, qaiǵyly jaǵdai 10 maýsym kúni Almaty qalasynda bolǵan. Aldyn ala málimet boiynsha, 6-synyp oqýshysyna birneshe ret pyshaq jaraqaty salynǵan. Jaraqat saldarynan bala oqiǵa ornynda kóz jumǵan.
Politsiia dereginshe, qylmysqa kúdikti retinde 13 jastaǵy jasóspirim ustalǵan. Onyń marqummen burynnan tanys bolǵany jáne ekeýiniń bir ortada júrgeni aityldy.
Tergeýdiń aldyn ala nusqasy boiynsha, qaiǵyly oqiǵa balalar arasyndaǵy janjaldyń ýshyǵýynan bolǵan. Qazirgi ýaqytta qylmystyq is qozǵalyp, oqiǵanyń barlyq mán-jaiy anyqtalyp jatyr. Sonymen qatar kúdiktiniń ata-anasynyń jaýapkershiligi de qarastyrylýda.
