Temirtaý qalasynda birneshe jyldan beri aiaqtalmai kele jatqan demalys alańy turǵyndardyń ashýyna tidi. Memlekettik biýdjetten bólingen 423,5 million teńgege qaramastan, joba tolyq aiaqtalmaǵan, dep habarlaidy Dalanews.kz.
Qazirgi tańda saiabaqta aǵashtar qýrap, ainalasy aramshóp pen qoqysqa tolǵan. Eń qaýiptisi – balalar ashyq jatqan elektr symdarynyń janynda oinap júr.
Jobany eki jyl ishinde aiaqtaý josparlanǵan. Alaida qurylys bastalǵanyna úsh jyl ótse de, saiabaq áli halyq igiligine berilgen joq. Merdiger retinde elordadaǵy «IKAS» JShS kompaniiasy tańdalǵan.
"Halyqtyń 500 million teńgesi qaida ketti? Qaida sol aqsha? Úsh jylda nege bul jer aiaqtalmady? Bul alań sonsha qarajatty talap etedi dep oilamaimyn", – deidi ashynǵan jergilikti turǵyndardyń biri.
Olardyń aitýynsha, alańda tek qýraǵan qaiyńdar men aramshóp, jerden shyǵyp jatqan elektr symdary jáne synǵan qurylymdar ǵana bar. Turǵyndar bul jaǵdaiǵa aýdan depýtaty Aleksei Lomakin men qalalyq ákimdikti tikelei jaýapty dep sanaidy.
"Úsh jylda myna kishkentai alańdy retke keltire almaý – uiat. Qarapaiym sharshy metr. Basqa elderde bútin qalalar men shaǵyn aýdandar salynyp jatyr. Al bizde bir saiabaqty bitirý úsh jylǵa sozylady. Bul kúlkili emes pe?", – deidi taǵy bir turǵyn.
Alańda ornatylǵan beinebaqylaý kameralary da jumys istemeidi, biraq olardyń qyzmetine biýdjetten qarajat bólinip jatyr. Bul da turǵyndardyń narazylyǵyn kúsheitken.
Saiabaq resmi túrde paidalanýǵa berilmegendikten, ony kútip-ustaý men tazalyq jumystary merdiger kompaniianyń jaýapkershiliginde. Alaida jergilikti halyq merdiger de, ákimdik te, depýtattar da jobany aiaqtaýǵa endi múddeli emes dep esepteidi.
