Qazaqstannyń Bas prokýrory Berik Asylov Djeffri Epshteinge qatysty taraǵan aqparattar boiynsha aldyn ala tekseris bastalǵanyn málimdedi, dep habarlaidy Dalanews.kz.
Onyń sózinshe, qadaǵalaýshy organ jariialanǵan materialdardy jan-jaqty zerdelep, onda aitylǵan bailanystar týraly derekterdiń shyndyqqa sáikestigin anyqtap jatyr. Sonymen birge Epshteinniń Qazaqstanǵa kelgen-kelmegeni jáne qazaqstandyq sheneýnikterdiń oǵan barǵan-barmaǵany da tekserilýde.
Bas prokýrordyń aitýynsha, bul jumystyń aiasynda Kárim Másimov pen Qairat Kelimbetovke qatysty málimetter de jeke qaralady.
Eske salaiyq, buǵan deiin Májilis depýtaty Ashat Rahymjanov Bas prokýratýra men UQK-den Djeffri Epshteinniń faildarynda aty atalǵan barlyq qazaqstandyqty, sondai-aq olarmen bailanysy bolýy múmkin tulǵalardy tekserýdi surady. Depýtat bul kezdesýlerdiń sipatyn anyqtaýdy talap etken edi.
Onyń aitýynsha, qupiia aqparattyń, sonyń ishinde memlekettik qupiialardyń syrtqa shyǵý qaýpin joqqa shyǵarýǵa bolmaidy. Depýtattyq saýal 25 aqpanda Berik Asylovqa jáne UQK tóraǵasy Ermek Saǵymbaevqa joldanǵan.
Rahymjanovtyń sózinshe, damyǵan demokratiialyq elderde bul daýǵa qatysy bar tulǵalarǵa qatysty parlamenttik tergeýler men qylmystyq qýdalaý bastalyp ketken.
"Muny jabýly qazan kúiinde qaldyrýǵa bolmaidy. Qujattarda "Eski Qazaqstannyń" joǵarǵy eshelonynda bolǵan, mańyzdy memlekettik qyzmet atqarǵan adamdar atalady. Bul endi olardyń jeke ómiri emes, memlekettiń qaýipsizdigi men eldiń bedeline qatysty másele. Mysaly, burynǵy premer-ministr ári UQK-niń eks-tóraǵasy Kárim Másimovjazbalarda keminde segiz ret kezdesedi", – dedi depýtat.
