Memleket basshysy «Taza Qazaqstan» ekologiialyq festivalinde sóz sóiledi, - dep habarlaidy Dalanews.kz
Prezident óz sózinde búgingi jiynnyń mańyzyna toqtalyp, «Tazalyq» festivali óte taǵylymdy is-shara ekenin aitty.
– Osydan bir jyl buryn bárimiz bir el bolyp «Taza Qazaqstan» jobasyn bastadyq. Men, eń aldymen, osy jalpyulttyq bastamaǵa alǵashqy kúnnen bastap belsene qatysyp jatqan ár azamatqa shyn júrekten rizashylyǵymdy bildiremin. Ásirese, solardyń qatarynda ózderińiz siiaqty jalyndy ári daryndy jastarymyz óte kóp. Sizder elimizdiń ár aimaǵynda eńbek etip, qoǵamdyq jumysqa atsalysyp júrsizder. Bul – úlgi bolarlyq is. Men Memleket basshysy retinde sizderdi árdaiym qoldaimyn! – dedi Qasym-Jomart Toqaev.
Memleket basshysy tazalyqtyń máni men maǵynasy jaiyndaǵy pikirimen bólisip, oidyń da, boidyń da, qorshaǵan ortanyń da tazalyǵyn saqtaý ár adamnyń ishki mádenietiniń kórsetkishi dep baǵa berdi. Sondyqtan tazalyq halqymyzdyń bolmysyna sińgen qasiet bolýy qajet ekenin únemi aityp kele jatqanyn eske saldy.
– Tazalyq ár adamnan, ár úiden, árbir kóshe men ár qaladan bastalýy kerek. Óitkeni «Taza Qazaqstan», bul – bir kúndik naýqan emes. Bul – bizdiń ómir saltymyz. «Jas kelse – iske» dep halqymyz beker aitpaǵan. Barshańyzdy tabiǵatty qorǵaý ideiasy biriktirip otyr. Sizder bárińiz birge istep jatqan jumystyń arqasynda bul igi bastama osyndai úlken qozǵalysqa ainaldy. Ortaq iske kúsh jumyldyrý degenimiz – osy, – dedi Prezident.
Qasym-Jomart Toqaev eriktilerdiń eńbegin de erekshe atap ótti. Onyń aitýynsha, volonter bolý, eń aldymen, naǵyz otanshyl azamat bolý, iaǵni, patriot bolý degen sóz. Sondai-aq Memleket basshysy ekologiiany jaqsartýǵa kásiporyndar men kásipkerler zor úles qosyp jatqanyna toqtaldy. Prezident «Taza Qazaqstan» aiasynda óte aýqymdy jumys atqarylǵanyn, milliondaǵan tonna qoqys jinalyp, kóshet egilgenin tilge tiek etti. Bul rette «Búkil qazaqstandyq aǵash egý kúni» aktsiiasynyń jaqsy dástúrge ainalǵanyn jetkizdi.
– Osy shara sheńberinde búkil elimiz boiynsha sońǵy úsh kúnde 4,5 millionǵa jýyq kóshet egilip, orman alqabymyzdy toltyrdy. Ainalamyzdy jinaý, aǵash otyrǵyzý arqyly biz jaily da taza qorshaǵan orta qalyptastyramyz. Barlyq aýla men kósheni, saiabaq pen alańqaidy uqypty ustaý – óz qolymyzda. Tazalyq pen tártip – durys ómir saltyn ustanýdyń basty kórinisi, – dedi Memleket basshysy.
Qasym-Jomart Toqaev tabiǵatty aialaý, tazalyq mádenietin árbir azamattyń, ásirese, jas urpaqtyń sanasyna sińirý ózekti dep sanaidy.
– Mysaly, qoqysty suryptaý, sý men jaryqty únemdeý, qoǵamdyq oryndy búldirmeý – asa mańyzdy. Bul bizdiń qoǵamnyń qalypty qaǵidatyna ainalýy qajet. Ekologiialyq aǵartý isine airyqsha mán bergen jón. Muny «Taza Qazaqstan» kampaniiasynyń negizgi baǵyttarynyń biri deýge bolady. Ýaqyt ótken saiyn kóptegen adamdardyń qorshaǵan ortany aialaýǵa, qorǵaýǵa umtylyp jatqanyn kórip otyrmyz. Azamattarymyz ekologiialyq talaptardy saqtap, ony sanaly túrde ómir saltyna ainaldyryp keledi. Men jańa ǵana kórmeni araladym. Onda ekologiiaǵa mán bergen kásiporyndarymyzdyń jumystary qoiylǵan. Olarǵa rizashylyǵymdy bildiremin. Qoǵamda jańa ekologiialyq mádeniet qalyptasyp jatyr. Tutas eldiń sana-sezimi ózgere bastady. Jastarymyz muny tereń túsinedi, – dedi Prezident.
