«Taza Qazaqstan» aktsiiasynyń «Jasyl aimaq» aptalyǵynyń aiaǵynda Túrkistanda aýqymdy ekologiialyq is-shara ótti. Tarihi shahar kezekti ret jasyl jelekpen tolyqtyryldy. Túrkistan oblysynyń ákimi Darhan Satybaldy «Jibek joly» saiabaǵynda kópshilikpen birge kóshet egip, turǵyndardy ekobelsendi bolýǵa shaqyrdy.
– Memleket basshysy Qasym-Jomart Kemeluly «Taza Qazaqstan» aktsiiasy naýqandyq emes, turaqty daǵdyǵa ainalatyn bastama ekenin aitty. Biz óńirimizde kógaldandyrý, abattandyrý jáne tazalyq jumystaryn turaqty túrde jalǵastyramyz. Qorshaǵan ortany taza ustaý, ekologiiany jaqsartýǵa úles qosý – bárimizdiń paryzymyz. Búgin otyrǵyzǵan kóshetterimiz jaiqalyp ósip, jazda turǵyndar men qonaqtarǵa saia bola bersin, – dedi Darhan Satybaldy.
Ekoaktsiiaǵa Túrkistan qalasynyń ákimi Nurbol Turashbekov, qalalyq máslihat depýtattary, meditsina men bilim mekemeleri, politsiia jáne tótenshe jaǵdai qyzmeti ókilderi, quqyq qorǵaý organdarynyń qyzmetkerleri qatysty.
Sonymen birge «Shapaǵat» qoǵamdyq birlestiginiń músheleri, oqýshylar, stýdentter, jergilikti fýtbolshylar, qurylysshylar, tazalyqqa jaýapty mekeme jumysshylary, Halyqqa qyzmet kórsetý ortalyǵy men «Qazaqstan temir joly» mekemesiniń ókilderi de belsene atsalysty. Saiabaq aýmaǵyna 100-den asa aǵash kósheti otyrǵyzyldy.
Túrkistan oblysynda «Taza Qazaqstan» aktsiiasy óte joǵary deńgeide jalǵasyp jatyr. Úsh apta kóleminde myńdaǵan kóshet otyrǵyzylyp, eldi mekender men kósheler tazalandy. «Kieli meken» aptalyǵynda qasietti oryndar men eskertkishter mańy tazalanyp, týristik nysandardyń ajary ashyla tústi.
