Memleket basshysy Qasym-Jomart Kemelulynyń tapsyrmasymen elimizde «Taza Qazaqstan» respýblikalyq baǵdarlamasy qolǵa alynǵan. Máselen búgin Túrkistan oblysyna qarasty, Jetisai qalasynda jalpyhalyqtyq senbilik uiymdastyryldy, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Atqarylǵan jumystar barysynda respýblikalyq, oblystyq mańyzy bar avtojoldar men ishki kóshelerdiń boiy kúl-qoqystardan tazartyldy. Sonymen qatar, aryq-atyzdar qatty turmystyq qaldyqtardan tazalandy. Nátijesinde senbilikke 13 tehnika men 1 myńnan astam adam jumyldyrylyp, 10 tonnadan astam qoqys shyǵaryldy.
Jetisai qalasynyń ardagerler qaýymdastyǵynyń tóraǵasy Muńalbek Jumabaevtyń sózinshe, qalada shara ekologiialyq mádenietti qalyptastyrý jáne turǵyndardyń tabiǵatqa degen súiispenshiligin oiatý maqsatynda turaqty túrde ótkizilip keledi. Sonymen qatar, qalada baǵdarlama aiasynda kógaldandyrý jáne abattandyrý jumystaryn júieli túrde jalǵasatyndyǵyn jáne apta saiyn uiymdastyrylatyndyǵyn jetkizdi.
Jalpy baǵdarlama bastalǵannan beri oblystaǵy senbilikter men tazalyq jumystaryna 300 myńnan astam turǵyn qatysyp, 1 500-den astam tehnika jumyldyryldy. Nátijesinde, 1 milionǵa jýyq aǵash otyrǵyzylyp, 3 389 tonna qoqys shyǵaryldy.
Sondai-aq «Taza Qazaqstan» respýblikalyq baǵdarlamasy aiasynda sáýir aiynan bastap júrgizilgen monitoring jumystarynyń nátijelerinde 2 880 qoqys úiindisi anyqtalyp, tolyq retke keltirilgen. Qazirgi ýaqytta 6 400-ge jýyq shaqyrym jolǵa 259 arnaiy tehnika, 655 jumysshy jáne 9 myń tekshe metrden astam qum men 5 800 tonna inertti material daiyn tur. Qys mezgilinde respýblikalyq jáne oblystyq mańyzy bar joldar men aiaqjoldardy qardan tazartý jumystarynyń oryndalý barysy qatań baqylaýǵa alynǵan.
Eske sala keteiik, ekologiialyq sharalary barysynda Túrkistan oblysynyń ákimi Darhan Satybaldynyń tapsyrmasy boiynsha «Úlgili aýyl» baiqaýy qolǵa alynǵan bolatyn. Osy oraida, Qazyǵurt aýdany, Sharbulaq aýyly «Úlgili aýyl» baiqaýynyń jeńimpazy atanǵan bolatyn. Baiqaý óńirdegi aýyldardyń ekonomikasyn órkendetip, turǵyndar úshin qolaily ómir súrý ortasyn qalyptastyrý baǵytynda qolǵa alynǵan.
Jalpy óńirdegi «Taza Qazaqstan» respýblikalyq baǵdarlamasy aiasynda is-sharalardyń uiymdastyrýdyń reitingi boiynsha Túrkistan qalasy jáne Báidibek, Jetisai, Maqtaaral, aýdandarynyń kórsetkishteri joǵary bolsa, Shardara, Otyrar aýdandary jáne Arys, Kentaý qalalary orta deńgeidegi kórsetkishterge qol jetkizdi. Al, Sairam, Tólebi, Túlkibas, Sozaq, Saryaǵash, Saýran, Qazyǵurt, Keles, Ordabasy aýdandarynyń kórsetkishteri tómen deńgeide. Qorshaǵan ortany qorǵaý jáne abattandyrý boiynsha tiimdi sharalar qolǵa alynyp, óńirdiń ekologiialyq turaqtylyǵyn qamtamasyz etý baǵytynda jumystar áli de jalǵasady.
