Jetisý oblysynda «Taza Qazaqstan» respýblıkalyq ekologıalyq aksıasy aıasynda tazalyq sharalary turaqty úrdiske aınalyp, jalǵasyp jatyr.

Turǵyndar tarapynan zor qoldaýǵa ıe bolǵan ekologıalyq sharaǵa búginde 172 myńnan astam adam atsalysyp, túrli tazalyq sharalaryna qatysty.

8 tamyz kúni oblysta birqatar ataýly sharalar uıymdastyryldy. Atap aıtar bolsaq, «Jetisý jastary» KMM jáne «Jasyl el» eńbek jasaqshylarymen birlese otyryp, Halyqaralyq jastar kúni qarsańynda jáne «Taza Qazaqstan» ekologıalyq aksıasy aıasynda «Jasyl el» - eko kvest» sharasy ótti.

Sharaǵa óńirdiń belsendi jastary, «Jasyl el» eńbek jasaqshylary jáne eriktiler qatysty. Jas eko-belsendiler arasynda birden sińip, jıi uıymdastyrylatyn jańashyl formattaǵy sharanyń maqsaty jastar men jasóspirimderge qorshaǵan ortanyń, tabıǵattyń tazalyǵy qanshalyqty mańyzdy ekenin kórsete otyryp, óz úlesterin qosýǵa yqpaldasý bolyp tabylady.

Atalǵan tazalyq kvesti Taldyqorǵan qalasynyń Ortalyq Arbatynda salatanatty túrde ashylyp, jınalǵan jurtshylyqty tazalyqqa shaqyrdy. Qatysýshy komandalarǵa tapsyrma oryndaý jáne tazalyq jumystaryn júrgizetin oryndar belgilenip, habarlandy. Ary qaraı, tazalyq kvesti ortalyq bazar mańynda tazalaý jumystarymen jalǵasyn tapty.

Sonymen qatar, qazirgi tańda jas býynnyń sportqa, onyń ishinde aýla sportyna qyzyǵýshylyǵy artqanyn eskere otyryp, oblys ortalyǵynda «Workout Taza Qazaqstan úshin» sporttyq sharasy ótkizildi. Atalǵan shara jastardy salaýatty ómir saltyna tárbıeleı otyryp, bos ýaqyttaryn tıimdi ári paıdaly ótkizýge shaqyrdy. Sporttyq jarys sońynda qatysýshylar alań mańyn turmystyq qoqystardan tazartyp, ár jas sportshynyń birinshi mindeti tazalyq pen jaýapkershilik ekenine úndedi.

Taldyqorǵan qalalyq jastar ortalyǵynyń jetekshisi Erkebulan Jaqan: «Jastardyń boıyna ıgi isterdi darytý barysynda olardyń qyzyǵýshylyqtaryn eskerip, olar sıaqty oılanyp qadam jasaý kerek ekeni anyq. Osy tusta, biz tazalyq jumystarynyń paıdaly ári qyzyqty bola alatynyn kórsetkimiz keledi. Jastardyń jańa ortasy tazalyqqa jaqyn bolsa, keleside dál osy qatysýshy óziniń taǵy bir dosyn da ertip keledi. Sóıtip, tazalyqqa jaqyn, týǵan jerin aıalaıtyn naǵyz janashyr jastardy qalyptastyra alamyz. Osy tusta, «Taza Qazaqstan» aksıasynyń qoǵamǵa bereri zor ekenin aıtqym keledi».

Sondaı-aq, Tekeli qalasynda «Tazalike» eko-chellendji uıymdastyryldy. Jańadan salynǵan sporttyq saýyqtyrý kesheni aýmaǵyna tazalyq jumystary júrgizilip, aksıa qala aýmaǵyndaǵy barlyq nysandaryǵa estafeta retinde joldandy. Al, aıdyndy Alakól aýdanynda «Alakol clean» ekologıalyq-shyǵarmashylyq baıqaýy ótkizildi. Óńir tazalyǵyn maqsat etken alakóldikter bul jaraǵa jasy da-qarty da qatar atsalysty.

Máselen, aǵa býyn belsendileri kól jaǵalaýyna tazalyq jumystaryn júrgizip, sonymen birge demalýshylardy tazalyqqa úndep, túsirdirý jumystaryn júrgizdi. Al, kól mańyndaǵy balajaılarda demalýshy oqýshylar ekologıalyq taqyrypta sýret salýdan jarysqa tústi. Osylaısha, bala kóńil el bolyp atsalysqan aýqymdy máselege óz úlesin qosty.

Sonymen qatar, oqýshy balalar arasynda «Taza Qazasqtan» aksıasy týraly ne bilesińder?», «Óz óńirimizdiń tazalyǵyn qalaı saqtaı alamyz?» degen syndy suraq-jaýap oıyndary uıymdastyrylyp, eń belsendi qatysýshylar marapattaldy.
Alakól aýdandyq «Analar keńesiniń» tóraǵasy Uljalǵas Dúısebaeva: «Taza Qazaqstan» aksıasyna el bolyp birigip qatysý, ony ár aýylda, ár aýla men kóshede uıymdastyrýdyń mańyzy zor. Qazirgi tańda jerlesterimizdiń birqatary atalmysh aksıanyń maqsatymen jaqsy tanys.

Qansha ýaqyttan beri turaqty túrde uıymdastyrylyp jatqan túrli tazalyq sharalanyń arqasynda kópshilik tazalyq saqtaýǵa beıimdelip te qaldy. Óziniń ǵana emes, ózgeniń de artynan jınaı salý, qoqys qaldyrmaý – týǵan jerge degen úlken mahabbattan bastaý alyp, azamattyq jaýapkershilikpen jalǵasatynyn ár adam túsinse deımiz».
Sarqan aýdanynda tazalyq belsendileriniń qatysýymen «Sarqan Green Battle» sharasy uıymdastyryldy. Eko-estafeta formatynda ótetin sharaǵa jastar men jasóspirimder qatysyp, túrli tapsyrmalardy oryndady. Jyldamdyqqa qoqys tazalaýdan jáne júgirýden jarysa otyryp, kedergilerden ótti.

Al, Kerbulaq aýdanynda «Tatý kórshiler – Taza Qazaqstan úshin» aksıasy ótkizildi. Saryózek aýylynyń turǵyndary ózderi turatyn kóshe boıyna tazalyq sharalaryn júrgize otyryp, jolyqqan turǵyndarǵa aksıanyń máni men mańyzyn túsindirdi. Ekologıalyq sharanyń ereksheligi, kórshilerdiń óz bastamasymen, bireýden kómek kútpeı, óz qoldarymen turatyn jerleriniń tazalyǵyn saqtaýǵa umtylýy bolyp tabylady. Óńirdegi tazalyq mádenıetiniń kórsetkishin osydan da baıqaýǵa bolady.

Kerbulaq aýdanynyń Qurmetti azamaty Ǵalıa Aqbasova: «Qazaq halqynda qaı kezeńde de kórshiler birigip, kóp ıgi istiń basyn qaıyrǵany belgili. Olaı bolsa, tazalyqqa da dál solaı tatýlyqty tý etip, birge atsalysýdy durys dep taptyq. Kóp birikken iste bereke bar. Aýylymyzdyń birligin tý etip, tazalyǵyn basqa óńirlerge úlgi etsek degen maqsatymyz da bar».

Aıta ketý kerek, «Taza Qazaqstan» aksıasy aıasynda Jetisý oblysynda jalpy 1187 tehnıka jumyldyrylyp, nátıjesinde 7055 tonna qoqys shyǵarylyp, 22255 km aryq jelisi tazalandy. Sonymen qatar, 25 826 m2 avtomobıl joldaryna aǵymdaǵy jóndeý jumystary júrgizildi. Oblys aýmaǵynda aksıa kezinde 29 514 túp kóshet otyrǵyzyldy.

Atalǵan jumystar oblystyń ár aýmaǵyn qamtyp, jyl sońyna deıin jalǵasyn tappaq.