Memleket basshysy Qasym-Jomart Toqaevtyń tapsyrmasymen elimizde «Taza Qazaqstan» ekologıalyq aksıasy bastalǵan bolatyn. 5 aptaǵa sozylatyn bul naýqannyń birinshi aptasy «Taza ólke» dep atalady. Bul bastamany Túrkistan oblysynyń tabıǵat janashyrlary qýanyshpen qabyldap, jumysty bastap ketti, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
basshysy Darhan Satybaldy «Belsendi demalys» saıabaǵyna aǵash otyrǵyzyp, «Taza Qazaqstan» sharasyna qoldaý bildirdi. Jańa aksıany qoldaý jóninde óz úndeýin jarıalady. Ekologıalyq aksıaǵa qatysqan jastarmen júzdesip, pikir almasty. Otanshyldyq – tazalyqtan bastalatynyn aıtyp, aǵash egip, týǵan jerdiń tazalyǵyn saqtaý, tabıǵatyn qorǵaý árbir adamnyń mindeti ekenin jetkizdi.
– Búgin biz qoǵam úshin mańyzdy ekologıalyq is-sharada kezdesip turmyz! Memleket basshysy Qasym-Jomart Kemelulynyń bastamasymen elimizde «Taza Qazaqstan» ekologıalyq aksıasy bastaldy. Bul bastamany Túrkistan oblysynyń tabıǵat janashyrlary qýanyshpen qabyldady.
Óıtkeni, óńirimizde belsendi, otanshyl azamattar óte kóp. Túrkistan oblysynda «Taza ólke – Túrkistan» aksıasyn bastadyq. Osyǵan baılanysty ótken aptadan beri aýdan, qalalarda tazalyq, kógaldandyrý jumystary bastalyp ketti. Bul – bir aılyq naýqan emes. Maqsatymyz – tazalyq saqtaý, aǵash, gúl egýdi ómirlik daǵdyǵa aınaldyrý.
Osy salaǵa jaýapty basqarmalarǵa, aýdan, qala ákimderine, komýnaldyq mekemelerge naqty tapsyrmalar berildi. Arnaıy tehnıkalar, resýrstar bólindi. Biz «Taza Qazaqstan» aksıasy aıasynda Túrkistanymyzdy odan saıyn túrlendire túsemiz! Oǵan múmkindigimiz jetedi, – dedi oblys ákimi Darhan Satybaldy.
Respýblıkalyq aksıanyń maqsaty – ekologıalyq mádenıetti qalyptastyrý, turǵyndardyń, jastardyń tabıǵatqa degen súıispenshiligin oıatý.
– «Tabıǵat – el baılyǵy» demekshi, memleket damýy úshin tabıǵatqa degen qurmet bolýy tıis. Qorshaǵan ortany qorǵaý arqyly Otanǵa degen patrıottyq sezim oıanady.
Sondyqtan, biz óz ortamyzdy, kóshemizdi, aýylymyzdy, qalamyzdy taza ustaýymyz kerek. Aryqtardy tazalap, bulaq kózderin ashý – mindetimiz! Osy baǵytta judyryqtaı jumylyp jumys isteımiz dep senemin! Memleket basshysynyń tapsyrmasy aıasynda 2021-2025 jyldar aralyǵynda óńirimizdegi 800-den astam eldi mekendi kógaldandyrý úshin 4 mıllıonnan astam kóshet egý kózdelgen.
Qazir jumystar júrýde. Bıyldyń ózinde 1 mıllıonnan astam kóshet egilýde. Taýlar da, ormandar da, ózen-kólder de, baıtaq dala da, aýyldar da, qalalar da – bizdiki. Osy baılyǵymyzǵa janashyrlyqpen qaraıyq! Kóshesiniń tazalyǵyna qarap, azamatyn, halqyn tanısyń. Endeshe, barsha Túrkistan óńiriniń turǵyndaryn osy aksıany qoldaýǵa shaqyramyn! Birlik pen eńbektiń arqasynda Túrkistanymyzdy jasyl aımaqqa aınaldyraıyq! – dedi oblys ákimi Darhan Satybaldy.
«Taza ólke» naýqany bastalǵaly beri oblysta 1500 kóshe jáne 33 myńnan astam aıaqjol tazalanyp, 850 tonna qoqys shyǵaryldy. Sondaı-aq 140 myńnan astam aǵash áktelip, 138 myńǵa jýyq kóshet otyrǵyzyldy. Budan bólek 275 saıabaq jáne skver, 192 dana balalar jáne sport alańshalary tazalandy. Bul is-sharalarǵa 279 tehnıka jáne 15 myńnan astam adam qatysty.
10 sáýir men 11 mamyr aralyǵynda Túrkistan oblysynda «Taza ólke – Túrkistan» naýqany ótedi. Ár aptaǵa arnaıy at berilip, túrli baǵytta ekologıalyq is-sharalar uıymdastyrylady. Oblystyń barlyq aýdanyn jáne qalalaryn qamtıtyn naýqanǵa oblystyń árbir turǵyny men qonaǵy qatysa alady.
