1 naýryz ben 1 sáýir aralyǵynda Almatyda «Taza Qazaqstan» baǵdarlamasy aiasynda «Almaty – bizdiń ortaq úiimiz» atty aýqymdy ekologiialyq naýqan ótip jatyr,- dep habarlaidy Dalanews.kz
Bul bastamanyń negizgi maqsaty – qala tazalyǵyn qamtamasyz etý arqyly onyń ekologiialyq jaǵdaiyn jaqsartý jáne turǵyndardyń qorshaǵan ortaǵa degen jaýapkershiligin arttyrý.
Naýqan bir aiǵa jalǵasatyndyqtan, ár aptaǵa arnaiy is-sharalar jospary ázirlengen:
- «Taza kósheler» (1-9 naýryz) – aialdamalardy, jol belgilerin tazartý, qoqys jáshikterin ornatý, magistraldardy abattandyrý.
- «Taza saiabaqtar, skverler men taýlar» (10-16 naýryz) – tabiǵi aýmaqtarda senbilikter uiymdastyrý, qoqys jinaý jumystary.
- «Taza aýlalar» (17-23 naýryz) – aýla aýmaqtaryn, balalar jáne sport alańdaryn tazalaý, abattandyrý elementterin syrlaý jáne kógaldandyrý. Sonymen qatar, «Úzdik aýla», «Úzdik aýla sypyrýshy», «Úzdik baý-baqsha» konkýrstary ótedi.
- «Bizdiń qala – bizdiń maqtanyshymyz» (24 naýryz – 1 sáýir) – eskertkishterdi abattandyrý jáne jappai aǵash otyrǵyzý.
Almaty qalasynyń ákimdigi turǵyndardy «Almaty – bizdiń ortaq úiimiz» ekologiialyq naýqanyna belsendi qatysýǵa shaqyrady.
Naýqan aiasynda Almaty ákimdigi kommýnaldyq salada eńbek etetin úzdik qyzmetkerlerdi anyqtaý maqsatynda «Úzdik kommýnaldyq qyzmetker» baiqaýyn jariialady.
Baiqaýdyń maqsaty – qala turǵyndarynyń ómir súrý jaǵdailaryn jaqsartý, kommýnaldyq qyzmet sapasyn arttyrý jáne osy saladaǵy bilikti mamandardy yntalandyrý. Oǵan kóshe tazalaýshylary, qurylysshylar, elektrmen qamtamasyz etý salasynyń mamandary jáne basqa da kommýnaldyq qyzmet ókilderi qatysa alady. Baiqaý jeńimpazdary arnaiy marapattar men alǵys hattarǵa ie bolady.
Ákimdiktiń málimdeýinshe, mundai sharalar Almaty qalasynyń kommýnaldyq qyzmet salasyn damytýǵa jáne ekologiialyq jaǵdaiyn jaqsartýǵa oń áser etedi. «Úzdik kommýnaldyq qyzmetker» baiqaýy – Almaty turǵyndarynyń ómir sapasyn arttyrýǵa baǵyttalǵan birqatar jobalardyń quramdas bóligi.
Almaty ákimdigi qala turǵyndaryn osy mańyzdy sharaǵa belsendi qatysýǵa shaqyrady jáne kommýnaldyq salanyń úzdik qyzmetkerleriniń esimderin jariialaýdy asyǵa kútedi.
