Taijanǵa «shantaj» jasaǵan kim?
Bárin basynan bastasaq. Óziniń áleýmettik paraqshasyndaǵy jazbasynda budan buryn Muhtar Taijan ózine áldebir adamnyń «shantaj» jasaǵanyn habarlaǵan bolatyn. «Shantaj» jasaǵan adammen Taijan betpe-bet kezdesken. Endeshe bolǵan jaidy qaz-qalpynda jetkizeiik.
Taijan bylai deidi:
Muny shantaj dep túsindim
«Dostar, ómir degen qyzyq nárse eken. Ótken aptada meni bir qazaqtildi jýrnalist «sen týraly nashar aqparym bar» dep kezdesýge shaqyrdy. Jalǵyz emes, júzdesetin jerge dosym Aidos Juqandy ertip bardym. Álgi adam «nashar aqparyn» kórsetip, «jariialaimyn» dedi… Birazdan soń «bir jobam bar, sony qarjylandyrý kerek» dep 3 mln. teńge surady. Óz basym muny «shantaj» dep túsindim.
«Qarajat berseń, muny jariia qylmaimyn, óshirip tastaimyn. Bermeseń, ákeńniń asynan keiin jariialaimyn» dedi. Dosym ekeýmiz kúldik jáne kórsetken materialdary jalǵan ekenin aittyq. Bul maǵlumattyń bári ótirik. Jariialap shyǵaramyn deseńiz, ózińiz bilińiz, biraq aqsha bermeimin dep, qaitardym. Jalpy, bul kisi jasy bizden áldeqaida úlken qazaqtildi jýrnalist. Ózi ómirbaqi «ultshylmyz ǵoi», qasymyzda júrgen edi, baiqasam ózi tiisti organdarǵa jumys jasap júrgen eken. Kóremiz endi, ómir degen shynymen qyzyq nárse…»
Osylai degen Muhtar Taijan búgin ózine «shantaj» jasaǵan adamnyń atyn atady.
«Aitýǵa týra kez keldi. Bul kisi – Geroihan Qystaýbaev bolatyn. Endi meni ári qarai jamandap júr» deidi ol.
Al Geroihan Qystaýbaev ne deidi? Muhtar Taijan «shantaj» jasady degen Qystaýbaevtyń bul týrasynda pikiri qandai? Kelesi kezekte osy kisiniń áleýmettik paraqshasyna úńildik.
Qystaýbaev bylai deidi:
«Qazaq keshirimshil, biraq keshirim suraýǵa qumar halyq emes!»
Geroihan Qystaýbaev
Birden aitaiyn, men Janat Esentaevtyń keshirim surap, bostandyqqa shyqqanyn aiypqa buiyrmaimyn. Ár adamnyń sheshimin syilaimyn.
Meniń aiypqa buiyratynym: Muhtar Taijan men Gúljan Erǵalievanyń qylyqtary!
Birinshiden, abaqtyda jatqan adamǵa, bótender túgili, óziniń baýyr-týysqandaryn zorǵa kirgizedi. Sonda Janatqa «aidaladaǵy» bular qalai kirip júr?! Bul búgingi barlyq zań ataýlyǵa qaishy áreket. Sonda bilik zańdy bulai óreskel buzýǵa qalai bardy? Budan keiin, bul eki «janashyr» jandy kimder dep aitýǵa bolady?
Ekinshiden, bulardyń osyndai jolmen kinásiz adamdy túrmeden «aman alyp qalǵany», shyn máninde, oilanyp kórsek – ulttyń rýhyn syndyrý! Eń ókinishtisi – mine osy! Ótkende bular: «500 adam qoldap, jón sanap otyr. Bilikten keshirim sura» dep Ermek Narymbaidy da azǵyrǵan edi.
Meniń bularǵa aitarym: Qazaq keshirimshil, biraq keshirim suramaǵan halyq! Sebebi bizdiń ata-babalarymyz qolymen jasaǵandy moinymen kótere bilgen, ór halyq. Sender qaita, qaita keshirim suratyp, sol órligimizden aiyratyn boldyńdar! Osylai kete bersek esikten engennen, shyǵyp ketkenge deiin, keshirim suraityn qul halyqqa ainalatynymyz daýsyz dúnie. Eldiń keleshegin oilaityn adamnyń osyǵan óresi jetýi tiis edi.
Úshinshiden, bular, osyndai «elge jasaǵan jaqsylyqtarymen» diktatorlyq júieni shetel aldynda aqtap jatyr.
Tórtinshiden, Janattyń keleshegin nege bular oilamaidy? Endi el abyroily, sal-seri Janatty qalai qabyldaidy? Osy jaǵyn oilandy ma, bul «meiirimdi» jandar?
Eger bular Janatqa shyn jandary ashysa, onda nege, mysaly, Muhtar ótkende Bas prokýrordyń orynbasarymen kezdeskende: «J. Esentaevtyń isi ádil qaralsyn. Meniń óz qadaǵalaýymda bolady» degen siiaqty, bir aýyz talap-eskertpe hatty, sol orynbasardyń atynan, Oral qalasynyń quqyqtyq mekemelerine jiberýin talap etpedi?! Mine bul tásil ári zańdy (!), ári Janattyń saǵyn syndyrmas edi!
Bolmasa, basqadai joldardy nege qarastyrmady? Mysaly: «Eshqandai jazyqsyz abaqtyda otyrǵan J. Esentaev bostandyqqa shyqpasa, Jer komissiiasy quramynan shyǵamyz» dep, nege talap qoimady?!
Joq! Olai emes! Azamattyń saǵyn syndyratyn joldy tańdady! Sonda bul kimge jasaǵan jaqsylyq?
Janattyń ózi osyndai oiǵa kelip, keshirim surasa, áńgime joq. Al ondai oiy joq adamdy zańdy belden basyp, túrmege kirip, keshirim suraýǵa úgittep kóndirý – ne sol adamnyń ózine, ne qoǵamǵa paidasy joq, zalaly orasan zor is.
Túrmede, syrttan beihabar jatqan adam artynan Almatydan ushaqpen arnaiy «izdep» kelgen «dostary» ne aitsa, soǵan senedi. Halyq solai dep jatsa, onda nesine men qisaiamyn? Daiyndap jazyp kelgen qaǵazyna qol qoia salaiyn dep oilaityny bek anyq.
Al «bostandyq» alyp bergen mundai «dostardan» dushpan artyq ekenin uqqanda, kesh bolady.
Qystaýbaevyń osylai deidi. Taijannyń pikirin de oqydyńyzdar.
Kimdiki durys jáne kimdiki burys, qalai oilaisyzdar?
Derekkózi: kaz.365info.kz
