"Kúni keshe alańǵa shyqqan halyqtyń qyr sońynan qalmai, qýalap, qýdalaǵan politsiianyń áperbaqan áreketi úshin keibireýler Ulttyq keńesti kinálaýda. Bul keńestiń iske kiriskenine áli ai da tolǵan joq.
Elimizdegi kúshtik qurylymdardyń bári, onyń ishinde IIM men UQK tikelei Qaýipsizdik keńesine baǵynatynyn bilmeisizder me? Qaýipsizdik keńesin Qazaqstandy 30 jyl bilep-tóstegen Nazarbaev basqaryp otyr, al onyń hatshysy atyshýly – Qalmuhamet Qasymov ekenin qalaisha umyttyńyzdar?", – deidi Taijan.
Onyń aitýynsha, ádildik izdegender aldymen Ishki ister ministri Turǵymbaevqa nemese UQK tóraǵasy Másimovke shaǵymdanýy qajet. Bul áldeqaida qisyndy bolady.
Saiasatkerdiń pikirinshe mitingidegi quqyq qorǵaý organdardyń ospadar áreketine qatysty aryz-shaǵymdardy olarǵa jón siltep otyrǵan jaýapty tulǵalarǵa joldaǵan jón!
"Al UQSK (Ulttyq qoǵamdyq senim keńesi) elimizdegi mitingiler, sailaý, saiasi partiialar týraly zań men saiasi tutqyndarǵa qatysty baptardy ózgertýge jol ashatyn jalǵyz múmkindik. Odan ózge amal bar ma? Bar bolsa káneki, kórsetińizder! Joq pa, endeshe kedergi keltirmeńizder.
Aryz-shaǵymnyń mekenjaiyn shatastyrmaýdy suraimyn. Ulttyq keńeske óz múmkindigin pash etý úshin tym bolmasa jyl aiaǵyna deiin ýaqyt berińizder. Kómek kórsetkilerińiz kelmeidi eken, endeshe kedergi keltirmeýdi suraimyn.
Osydan 4 ai buryn Qosanovqa daýys ber dep óńeshin jyrtqan keibir saiasatkersymaqtar jumǵan aýzyn ashpai, tynysh jatsa bolar edi", – deidi Muhtar Taijan.
Taijan Ulttyq keńeske qarata aitylǵan eshbir syni pikirdi jaýapsyz qaldyrǵan emes. Buǵan deiin ol Keńes quramyndaǵy qoǵamǵa tanymal azamattardyń UQSK-dan shyǵýyn talap etken úndeýge bailanysty óz pikirin bildirgen edi.
"Ulttyq keńesten shyǵyńdar" degen uran paida boldy. Al, shyqtyq deiik, ne uttyq? Ári qarai áleýmettik jelide bir-birimizge aqyl aityp otyra beremiz be? Osy keńesten ózge siz ben bizdiń qolymyzda qandai qural bar, kórsetińdershi?! Partiiamyz bar ma? Qozǵalysymyz bar ma? Ne bar ózi? Túgimiz joq", – deidi saiasatker.
Taijan Ulttyq keńestiń jumysyna kedergi keltirmeýdi suraidy. Onyń pikirinshe bilik berip otyrǵan bul múmkindikti paidalanyp, paidaly áreket etý qajet.
"Tózim kerek, sabyr saqtańyzdar. Ýaqyt berińizder. Birden bári biz qalaǵandai bolmaidy. 30 jylǵy siresken júieni eki aptanyń ishinde ózgertem deý oilaý ańǵaldyq. Olai bolmaidy", – deidi Taijan.
Aitpaqshy osy joly mitingige shyqqan halyqty qoltyqtai jónelgen quqyq qorǵaýshylardyń maskasy bolǵan joq.
"Bul da bolsa ilgerileýdyń belgisi. Politsiia osy joly betperdesiz júrdi. Biz Mitingiler jáne jiyndar týraly sonaý 1995 jyly qabyldanǵan zańdy ózgertýimiz kerek. Mitingiler biliktiń ruqsatymen emes, halyqtyń tarapynan habarlandyrý arqyly uiymdastyrylýy qajet. Osy kezde alańǵa shyqqan jurtty ózge órkenietti elderdegidei politsiia kúzetip, syrtynan baqylaityn bolady", – deidi saiasatker.
Ázirlegen, Dýman BYQAI
