"كۇنى كەشە الاڭعا شىققان حالىقتىڭ قىر سوڭىنان قالماي، قۋالاپ، قۋدالاعان پوليسيانىڭ اپەرباقان ارەكەتى ءۇشىن كەيبىرەۋلەر ۇلتتىق كەڭەستى كىنالاۋدا. بۇل كەڭەستىڭ ىسكە كىرىسكەنىنە ءالى اي دا تولعان جوق.
ەلىمىزدەگى كۇشتىك قۇرىلىمداردىڭ ءبارى، ونىڭ ىشىندە ءىىم مەن ۇقك تىكەلەي قاۋىپسىزدىك كەڭەسىنە باعىناتىنىن بىلمەيسىزدەر مە؟ قاۋىپسىزدىك كەڭەسىن قازاقستاندى 30 جىل بيلەپ-توستەگەن نازاربايەۆ باسقارىپ وتىر، ال ونىڭ حاتشىسى اتىشۋلى – قالمۇحامەت قاسىموۆ ەكەنىن قالايشا ۇمىتتىڭىزدار؟"، – دەيدى تايجان.
ونىڭ ايتۋىنشا، ادىلدىك ىزدەگەندەر الدىمەن ىشكى ىستەر ءمينيسترى تۇرعىمبايەۆقا نەمەسە ۇقك ءتوراعاسى ماسىموۆكە شاعىمدانۋى قاجەت. بۇل الدەقايدا قيسىندى بولادى.
ساياساتكەردىڭ پىكىرىنشە ميتينگىدەگى قۇقىق قورعاۋ ورگانداردىڭ وسپادار ارەكەتىنە قاتىستى ارىز-شاعىمداردى ولارعا ءجون سىلتەپ وتىرعان جاۋاپتى تۇلعالارعا جولداعان ءجون!
"ال ۇقسك (ۇلتتىق قوعامدىق سەنىم كەڭەسى) ەلىمىزدەگى ميتينگىلەر، سايلاۋ، ساياسي پارتيالار تۋرالى زاڭ مەن ساياسي تۇتقىندارعا قاتىستى باپتاردى وزگەرتۋگە جول اشاتىن جالعىز مۇمكىندىك. ودان وزگە امال بار ما؟ بار بولسا كانەكي، كورسەتىڭىزدەر! جوق پا، ەندەشە كەدەرگى كەلتىرمەڭىزدەر.
ارىز-شاعىمنىڭ مەكەنجايىن شاتاستىرماۋدى سۇرايمىن. ۇلتتىق كەڭەسكە ءوز مۇمكىندىگىن پاش ەتۋ ءۇشىن تىم بولماسا جىل اياعىنا دەيىن ۋاقىت بەرىڭىزدەر. كومەك كورسەتكىلەرىڭىز كەلمەيدى ەكەن، ەندەشە كەدەرگى كەلتىرمەۋدى سۇرايمىن.
وسىدان 4 اي بۇرىن قوسانوۆقا داۋىس بەر دەپ وڭەشىن جىرتقان كەيبىر ساياساتكەرسىماقتار جۇمعان اۋزىن اشپاي، تىنىش جاتسا بولار ەدى"، – دەيدى مۇحتار تايجان.
تايجان ۇلتتىق كەڭەسكە قاراتا ايتىلعان ەشبىر سىني پىكىردى جاۋاپسىز قالدىرعان ەمەس. بۇعان دەيىن ول كەڭەس قۇرامىنداعى قوعامعا تانىمال ازاماتتاردىڭ ۇقسك-دان شىعۋىن تالاپ ەتكەن ۇندەۋگە بايلانىستى ءوز پىكىرىن بىلدىرگەن ەدى.
"ۇلتتىق كەڭەستەن شىعىڭدار" دەگەن ۇران پايدا بولدى. ال، شىقتىق دەيىك، نە ۇتتىق؟ ءارى قاراي الەۋمەتتىك جەلىدە بىر-بىرىمىزگە اقىل ايتىپ وتىرا بەرەمىز بە؟ وسى كەڭەستەن وزگە ءسىز بەن ءبىزدىڭ قولىمىزدا قانداي قۇرال بار، كورسەتىڭدەرشى؟! پارتيامىز بار ما؟ قوزعالىسىمىز بار ما؟ نە بار ءوزى؟ تۇگىمىز جوق"، – دەيدى ساياساتكەر.
تايجان ۇلتتىق كەڭەستىڭ جۇمىسىنا كەدەرگى كەلتىرمەۋدى سۇرايدى. ونىڭ پىكىرىنشە بيلىك بەرىپ وتىرعان بۇل مۇمكىندىكتى پايدالانىپ، پايدالى ارەكەت ەتۋ قاجەت.
"ءتوزىم كەرەك، سابىر ساقتاڭىزدار. ۋاقىت بەرىڭىزدەر. بىردەن ءبارى ءبىز قالاعانداي بولمايدى. 30 جىلعى سىرەسكەن جۇيەنى ەكى اپتانىڭ ىشىندە وزگەرتەم دەۋ ويلاۋ اڭعالدىق. ولاي بولمايدى"، – دەيدى تايجان.
ايتپاقشى وسى جولى ميتينگىگە شىققان حالىقتى قولتىقتاي جونەلگەن قۇقىق قورعاۋشىلاردىڭ ماسكاسى بولعان جوق.
"بۇل دا بولسا ىلگەرىلەۋدىڭ بەلگىسى. پوليسيا وسى جولى بەتپەردەسىز ءجۇردى. ءبىز ميتينگىلەر جانە جيىندار تۋرالى سوناۋ 1995 جىلى قابىلدانعان زاڭدى وزگەرتۋىمىز كەرەك. ميتينگىلەر بيلىكتىڭ رۇقساتىمەن ەمەس، حالىقتىڭ تاراپىنان حابارلاندىرۋ ارقىلى ۇيىمداستىرىلۋى قاجەت. وسى كەزدە الاڭعا شىققان جۇرتتى وزگە وركەنيەتتى ەلدەردەگىدەي پوليسيا كۇزەتىپ، سىرتىنان باقىلايتىن بولادى"، – دەيدى ساياساتكەر.
ازىرلەگەن، دۋمان بىقاي
