Bul týraly qoǵam belsendisi Muhtar Taijan Facebook-tegi jeke paraqshasynda jazdy. Ol «Jer jappai satylady jáne sheteldikterge jalǵa beriledi» degen maǵynadaǵy áleýmettik jelide taraǵan aqparattar jalǵan ekenin basa aitady.
«Sońǵy kúnderi áleýmettik jelilerde
«aqpannyń 14-nen keiin jer jappai satylady jáne sheteldikterge 25 jylǵa jalǵa beriledi» degen arandatýshy aqparattar paida boldy. Áleýmettik jelidegi qaýymnyń shymbaiyna batqan bul — ótirik, arandatýshy aqparat.
Ózderińiz qarańyzdarshy, jer týraly zańǵa 2016 jyly moratorii jariialandy. Sodan beri onyń talqysyna qatysyp, qyzý aitystardan ótip, búgingi zań jobasyn ázirledik. Oǵan men bir jarym jyl boiyna úzdiksiz qatystym. Mine, sol kezde jalǵan aqparatty taratýshylar qaida boldy? Tanadai tynyshtyq. „Sen jer máselesimen ainalysyp júrsiń, qalai bop jatyr„ degen bireýi bolmady ǵoi sonda.
Ótken jyldyń qarasha aiynda biz daiyndaǵan zań jobasy birinshi oqylymda maquldandy. Attandasa, nege sol kezde attandamady?
Bálkim, bul bilik úshin tartystyń saldary shyǵar, bálkim, qazir bireýlerge halyqty kóshege shyǵarý qajet bop turǵan shyǵar. Basqasha muny qalai túsindirýge bolady? Jalǵan aqparatty taratýshy menmin dep ortaǵa shyqpady. Anonim. Osynyń ózi kúdik týǵyzady ári onyń jalǵandyǵyn pash etedi.
Endi zańnyń ózine keleiik.
Biz qaraǵan zań jobasynda kerisinshe, halyqtyń múddesi meiilinshe eskerildi. Mysaly, jaiylymdyq jerge, 10 sotyq jer telimine qatysty, latifýndizmge qarsy naqty normalar bar onda.
Sondyqtan, bizdiń zańymyz qabyldanǵannan keiin «jer jappai satylady nemese sheteldikterge jalǵa beriledi» degen sóz jalǵan», — dep jazdy Muhtar Taijan.
Ol jer týraly zańǵa qatysty aqpannyń 16-synda úlken jiyn, qoǵamdyq talqylaý ótkiziletinin de atap ótipti.
«Jan-jaqtan, aimaqtardan bedeldi, salmaqty azamattar keledi. Bilikti zańgerler táýelsiz saraptama daiyndap, qoǵam talqylaýynda baiandap beredi. Sondyqtan, bul zańda esh halyqtan jasyratyn nemese halyqqa ziiandy nárseler joq. Muny men senimdilikpen aityp otyrmyn», — deidi Muhtar Taijan.
Aita ketsek, qazirgi ýaqytta QR Parlament Májilisiniń jumysynda «Jer qatynastaryn retteý máseleleri boiynsha QR keibir zańnamalyq aktilerine ózgerister men tolyqtyrýlar engizý» týraly zań jobasy qaralýda.
Daiyndaǵan, Kámshat SÁTIEVA
