بۇل تۋرالى قوعام بەلسەندىسى مۇحتار تايجان Facebook-تەگى جەكە پاراقشاسىندا جازدى. ول «جەر جاپپاي ساتىلادى جانە شەتەلدىكتەرگە جالعا بەرىلەدى» دەگەن ماعىناداعى الەۋمەتتىك جەلىدە تاراعان اقپاراتتار جالعان ەكەنىن باسا ايتادى.
«سوڭعى كۇندەرى الەۋمەتتىك جەلىلەردە
«اقپاننىڭ 14-نەن كەيىن جەر جاپپاي ساتىلادى جانە شەتەلدىكتەرگە 25 جىلعا جالعا بەرىلەدى» دەگەن ارانداتۋشى اقپاراتتار پايدا بولدى. الەۋمەتتىك جەلىدەگى قاۋىمنىڭ شىمبايىنا باتقان بۇل — وتىرىك، ارانداتۋشى اقپارات.
وزدەرىڭىز قاراڭىزدارشى، جەر تۋرالى زاڭعا 2016 جىلى موراتوريي جاريالاندى. سودان بەرى ونىڭ تالقىسىنا قاتىسىپ، قىزۋ ايتىستاردان ءوتىپ، بۇگىنگى زاڭ جوباسىن ازىرلەدىك. وعان مەن ءبىر جارىم جىل بويىنا ۇزدىكسىز قاتىستىم. مىنە، سول كەزدە جالعان اقپاراتتى تاراتۋشىلار قايدا بولدى؟ تاناداي تىنىشتىق. „سەن جەر ماسەلەسىمەن اينالىسىپ ءجۇرسىڭ، قالاي بوپ جاتىر„ دەگەن بىرەۋى بولمادى عوي سوندا.
وتكەن جىلدىڭ قاراشا ايىندا ءبىز دايىنداعان زاڭ جوباسى ءبىرىنشى وقىلىمدا ماقۇلداندى. اتتانداسا، نەگە سول كەزدە اتتاندامادى؟
بالكىم، بۇل بيلىك ءۇشىن تارتىستىڭ سالدارى شىعار، بالكىم، ءقازىر بىرەۋلەرگە حالىقتى كوشەگە شىعارۋ قاجەت بوپ تۇرعان شىعار. باسقاشا مۇنى قالاي تۇسىندىرۋگە بولادى؟ جالعان اقپاراتتى تاراتۋشى مەنمىن دەپ ورتاعا شىقپادى. انونيم. وسىنىڭ ءوزى كۇدىك تۋعىزادى ءارى ونىڭ جالعاندىعىن پاش ەتەدى.
ەندى زاڭنىڭ وزىنە كەلەيىك.
ءبىز قاراعان زاڭ جوباسىندا كەرىسىنشە، حالىقتىڭ مۇددەسى مەيىلىنشە ەسكەرىلدى. مىسالى، جايىلىمدىق جەرگە، 10 سوتىق جەر تەلىمىنە قاتىستى، لاتيفۋنديزمگە قارسى ناقتى نورمالار بار وندا.
سوندىقتان، ءبىزدىڭ زاڭىمىز قابىلدانعاننان كەيىن «جەر جاپپاي ساتىلادى نەمەسە شەتەلدىكتەرگە جالعا بەرىلەدى» دەگەن ءسوز جالعان»، — دەپ جازدى مۇحتار تايجان.
ول جەر تۋرالى زاڭعا قاتىستى اقپاننىڭ 16-سىندا ۇلكەن جيىن، قوعامدىق تالقىلاۋ وتكىزىلەتىنىن دە اتاپ ءوتىپتى.
«جان-جاقتان، ايماقتاردان بەدەلدى، سالماقتى ازاماتتار كەلەدى. بىلىكتى زاڭگەرلەر تاۋەلسىز ساراپتاما دايىنداپ، قوعام تالقىلاۋىندا بايانداپ بەرەدى. سوندىقتان، بۇل زاڭدا ەش حالىقتان جاسىراتىن نەمەسە حالىققا زياندى نارسەلەر جوق. مۇنى مەن سەنىمدىلىكپەن ايتىپ وتىرمىن»، — دەيدى مۇحتار تايجان.
ايتا كەتسەك، قازىرگى ۋاقىتتا ق ر پارلامەنت ءماجىلىسىنىڭ جۇمىسىندا «جەر قاتىناستارىن رەتتەۋ ماسەلەلەرى بويىنشا ق ر كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ» تۋرالى زاڭ جوباسى قارالۋدا.
دايىنداعان، كامشات ساتييەۆا
