Táýelsizdik qurdasy: "Órt sóndirý salasynda býyn almasý úrdisi jolǵa qoiylǵan"
Bul salanyń qazanynda qainaǵan tájiribeli órt sóndirýshiler "otpen oinaýǵa bolmaidy" degen támsildi jii qaitalaidy. Olardyń pikirinshe, mundai mamandyqty igergen azamattar ómir boiy halyqpen bite qainasyp, olardyń qaiǵysy men qýanyshyna ortaqtasyp júredi.
Al osy órt sóndirý salasynda býyn almasý protsesi jolǵa qoiylǵan ba? Jastar osy salaǵa kelýge qanshalyqty yntyq?
Bul týraly bizge Nur-Sultan qalasyndaǵy №10 órt sóndirý bólimshesiniń mamany Rýslan Kóbetaev egjei-tegjeili aityp berdi.
"Bul salada óz qyzmetine adal, kásibin sheksiz súietin erjúrek, batyl, batyr órt sóndirýshiler az emes. Olardyń kópshiligi aǵa býyn. Bizder, jastar olardan úlgi alamyz, sebebi tájiribemiz áli tolyq tolysqan joq", – deidi ol.
Rýslan Táýelsizdikpen túidei qarsy. Egemendik alǵan eleń-alań shaqta dúnie esigin ashqan ol osynaý mamandyqty tańdaǵanyna esh ókinbeidi.
"Qiyndyqqa shydas beremiz. Men SQO-nyń Amangeldi dep atalatyn aýdanynda ómirge keldim. Ol jaqtyń qysy qatty bolaryn, kózi qaraqty jurt jaqsy biledi. Esesine mundai ortada ósken adam shymyr bolyp keledi", – deidi órt sóndirýshi.
Órt sóndirý salasynda 2014 jyldan beri eńbek etetin ol azamattyq qorǵaý salasyn jetildirýge azdy-kópti úles qosyp júrgen jas mamannyń biri. Óz qyzmetinen bólek, qoǵamdyq ómirde de belsendi. Sportpen shuǵyldanyp, jumystan qoly qalt etken ýaqytta hokkei oinaǵandy unatady.
Qyzmetke turǵaly beri 8 jyldyń ishinde Táýelsizdik qurdasy ózin tek jaqsy qyrynan kórsete bilgen. Talai órt oshaǵyna jedel attanyp, tilsiz jaýdy aýyzdyqtaǵan Rýslan Kóbetaev áriptesteriniń ortasynda syily, bilikti maman.
Buǵan byltyrǵy jyldyń shildesine bolǵan myna bir oqiǵa aiqyn dálel bola alady.
Byltyr shilińgir shilde aiynda kópqabatty úide ornalasqan páterlerdiń birinen shuǵyl habarlama túsedi. Terezeniń tap aldynda oinap otyrǵan balalar qoly taiyp ketse, tómen qarai quldilaýy áp-sátte edi. Oqiǵa ornyna edel-jedel jetken №10 órt sóndirý bóliminiń brigadasy tap terezeniń aldynda oinap otyrǵan balalardy qutqarýdyń jolyn izdep, oilasa bastaidy. Olardyń qatarynda bizdiń keiipkerimiz de bolǵan edi...
Rýslan shiraq qimyldap, basqysh arqyly 4 qabatqa kóterilip, ashyq turǵan terezeniń túbinde oinap otyrǵan búldirshinderdi qutqaryp qalady.
Qutqarýshynyń kásibiligi men biliktiliginiń nátijesinde 6 jáne 8 jasar búldirshin ata-anasynyń qolyna aman esen tabystalǵan eken. Osy erligi úshin bizdiń keiipkerimiz, osy sala mamandary arasynda erekshe baǵalanatyn II-shi dárejeli "Qutqarýshy" tósbelgisimen marapattaldy.
"Órt sóndirýshi men qutqarýshynyń jumysynda úreige boi aldyrmaý qajet. Boiyńdy bilegen qorqynysh qatelikke uryndyrady, osyny eskerý qajet. Óz ózińe degen senimdilik seni qaýip-qaterden qorǵaidy, túptep kelgende bul órt sóndirý salasy ǵana emes, kúlli ómirdiń kredosy ispettes.
Óz jumysyma maman retinde baǵa berer bolsam, men úshin eń mańyzdysy adam ómirin saqtaý, beibit turǵyndardyń zardap shekkenin qalamaimyn. Sol sebepti oqiǵa ornyna jetkende eń aldymen jaraqat alǵan azamattar bar ma, joq pa sony anyqtaimyz.
Shyny kerek, talai tragediiaǵa kýá boldyq. Kei kezderi tilsiz jaýdyń tyrnaǵyna beikúná balalar iligip jatady, sol kezde júregiń qars aiyrylady, ózińdi qoiarǵa jer tappaisyń. Sharasyzdyqtan kózińe jas tolady. Muny bekerge aityp otyrǵan joqpyn. Árbir ata-ana urpaǵynyń saýlyǵy men saqtyǵyn oilaýy qajet. Balalardy eki shoqyp, bir qaraý kerek. Olar búginginiń jalǵasy. Bala degenimiz bailyq, eldiń erteńi qazirgi óskeleń urpaqpen qatar óriledi. Al biz, Táýelsizdik tustastary egemendikti baiandy etý úshin óz-ózimizdi úzdiksiz jetildirýdi umytpaiyq", – deidi Rýslan Kóbetaev.
