S. Bekishov óz sózinde Memleket basshysynyń qant qyzylshasyn qaita órkendetý týraly tapsyrmasyn oryndaý maqsatynda oblysta atqarylǵan tyndyrymdy istiń nátijesinde sońǵy úsh jylda qant qyzylshasynyń alqaby edáýir ulǵaitylǵanyn atap ótti. Ótken jyly Almaty oblysynyń qyzylshashylary 6,4 myń gektarǵa tátti túbir ósirse, biylǵy jyly bul daqyl alqabynyń kólemi 9 myń gektarǵa jetip otyr. Aqsý qant zaýytyn qaita qalpyna keltirý jumystary qarqyndy júrip jatyr, kásiporyn jýyq arada shikizat qabyldaýdy bastamaq. Sonymen qatar óńir qyzylshashylaryna tuqym, tyńaitqyshtar, janar-jaǵar mai, jańa tehnika alýǵa, ónim jinaýǵa kórsetiletin járdem jalǵasýda.
Qapshaǵaidan jetken avtokerýenge keletin bolsaq, ol «Esen-Aman» sharýa qojalyǵynan ákelingen. Qojalyq biylǵy jyly qyzylsha ósirýmen alǵash ret ainalysyp, 20 gektar jerge daqyl sepken. Mamandar qapshaǵailyq tátti túbirdiń qanttylyǵyn joǵary – 19 % dep baǵalap otyr. «Bul óte jaqsy kórsetkish», - deidi olar.
Atalmysh qojalyq iskerlik qatynas ornatqan «Agro Qant» servistik-daiyndaý ortalyǵy» JShS kólik tasymaly jaǵynan járdemdesken. Onyń basshysy Gúljámilá Bekievanyń aitýynsha, qapshaǵailyq qyzylshashylar biyl mol ónim jinaýdy mejelep otyr. Biyl Qapshaǵai qalasynda 570 gektarǵa qant qyzylshasy sebilgen. Gektaryna 350-400 tsentnerden ónim jinaý josparlanǵanymen, búgingi kúni shaýrashylyqtar gektaryna 600 tsentnerge deiin ónim alýda. Kóksý qant zaýytyna óńdeýge «Esen-Aman» sharýa qojalyǵy jalpy kólemi 20 myń tonna bolatyn tátti túbir ótkizýdi kózdep otyr. Qapshaǵailyqtardyń qant qyzylshasyn ótkizý estafetasyn endi Eskeldi men Kóksý aýdany jalǵastyrmaq.
