س. بەكىشوۆ ءوز سوزىندە مەملەكەت باسشىسىنىڭ قانت قىزىلشاسىن قايتا وركەندەتۋ تۋرالى تاپسىرماسىن ورىنداۋ ماقساتىندا وبلىستا اتقارىلعان تىندىرىمدى ءىستىڭ ناتيجەسىندە سوڭعى ءۇش جىلدا قانت قىزىلشاسىنىڭ القابى ەداۋىر ۇلعايتىلعانىن اتاپ ءوتتى. وتكەن جىلى الماتى وبلىسىنىڭ قىزىلشاشىلارى 6،4 مىڭ گەكتارعا ءتاتتى ءتۇبىر وسىرسە، بيىلعى جىلى بۇل داقىل القابىنىڭ كولەمى 9 مىڭ گەكتارعا جەتىپ وتىر. اقسۋ قانت زاۋىتىن قايتا قالپىنا كەلتىرۋ جۇمىستارى قارقىندى ءجۇرىپ جاتىر، كاسىپورىن جۋىق ارادا شيكىزات قابىلداۋدى باستاماق. سونىمەن قاتار ءوڭىر قىزىلشاشىلارىنا تۇقىم، تىڭايتقىشتار، جانار-جاعار ماي، جاڭا تەحنيكا الۋعا، ءونىم جيناۋعا كورسەتىلەتىن جاردەم جالعاسۋدا.
قاپشاعايدان جەتكەن اۆتوكەرۋەنگە كەلەتىن بولساق، ول «ەسەن-امان» شارۋا قوجالىعىنان اكەلىنگەن. قوجالىق بيىلعى جىلى قىزىلشا وسىرۋمەن العاش رەت اينالىسىپ، 20 گەكتار جەرگە داقىل سەپكەن. ماماندار قاپشاعايلىق ءتاتتى ءتۇبىردىڭ قانتتىلىعىن جوعارى – 19 % دەپ باعالاپ وتىر. «بۇل وتە جاقسى كورسەتكىش»، - دەيدى ولار.
اتالمىش قوجالىق ىسكەرلىك قاتىناس ورناتقان «اگرو قانت» سەرۆيستىك-دايىنداۋ ورتالىعى» ج ش س كولىك تاسىمالى جاعىنان جاردەمدەسكەن. ونىڭ باسشىسى گۇلجاميلا بەكييەۆانىڭ ايتۋىنشا، قاپشاعايلىق قىزىلشاشىلار بيىل مول ءونىم جيناۋدى مەجەلەپ وتىر. بيىل قاپشاعاي قالاسىندا 570 گەكتارعا قانت قىزىلشاسى سەبىلگەن. گەكتارىنا 350-400 سەنتنەردەن ءونىم جيناۋ جوسپارلانعانىمەن، بۇگىنگى كۇنى شاۋراشىلىقتار گەكتارىنا 600 سەنتنەرگە دەيىن ءونىم الۋدا. كوكسۋ قانت زاۋىتىنا وڭدەۋگە «ەسەن-امان» شارۋا قوجالىعى جالپى كولەمى 20 مىڭ توننا بولاتىن ءتاتتى ءتۇبىر وتكىزۋدى كوزدەپ وتىر. قاپشاعايلىقتاردىڭ قانت قىزىلشاسىن وتكىزۋ ەستافەتاسىن ەندى ەسكەلدى مەن كوكسۋ اۋدانى جالعاستىرماق.
