"Tátishevti óltirdi" dep aiyptalǵan Murathan Toqmádi jazasyn qysqartýdy surap, sotqa qaita ótinish bergen. Bul týraly zańger Anna Chernova málim etti, dep habarlaidy Dalanews.kz.
Zańgerdiń aitýynsha, Toqmádi bul joly prokýratýra ózin aldaǵanyn jáne protsessýaldy ádiletsizdikke ushyraǵanyn alǵa tartqan. Alaida Chernova qolyndaǵy qujattarǵa súiene otyryp, prokýratýranyń protsessýaldyq kelisim sharttaryn tolyq oryndaǵanyn málimdedi.
“Qasaqana tapsyryspen adam óltirý qylmysy úshin eń tómengi jaza retinde 10 jyl bas bostandyǵynan aiyrý jazasy taǵaiyndaldy. Keiin bul merzim taǵy da qysqardy. Endi buny qalai jeńildetýge bolady? Qasaqana adam óltirý isterinde jeńil jaza múldem bolmaýy kerek”, – dep jazdy ol.
Anna Chernova bul iske qatysty sot protsesi 16 qańtar kúni Qonaev qalasynda ótetinin habarlap, ádil sheshim qabyldanatynyna senim bildirdi.
“Prezident Qasym-Jomart Toqaev aitqandai, ádildik, zań jáne tártip bárinen joǵary bolýy tiis. Bul joly da ádildik ornaidy dep úmittenemiz”, – dedi zańger.
Eske salaiyq, 2004 jyly Erjan Tátishev basyna tigen oqtan kóz jumǵan edi. Tergeý bankirdiń ańshylyq kezindegi "oqys jaǵdaidan" qaza tapty degen qorytyndyǵa kelgen.
Kásipker Murathan Toqmádige "Abaisyzda ólimge ákep soqtyrý" baby boiynsha aiyp taǵyldy. Sot ony bir jylǵa bas bostandyǵyn shekteý jazasyna kesti.
2017 jyly is qaita qaraldy, Toqmádi bankirdi óltirgenin moiyndady. Is materialyna sáikes, ol marqumdy Muhtar Ábiliazovtyń qysymymen óltirgen.
2018 jyldyń naýryz aiynda Toqmádi 10,5 jylǵa bas bostandyǵynan aiyryldy.
