"Tátishevti óltirdi" dep aıyptalǵan Murathan Toqmádı jazasyn qysqartýdy surap, sotqa qaıta ótinish bergen edi. Alaıda búgingi sot otyrysynda ol shartty túrde merziminen buryn bosatý týraly ótinishin qaramaýdy surady, dep habarlaıdy Dalanews.kz.

Murathan Toqmádıdiń ózi sot otyrysyna qatyspady. Al bul aqparatty onyń advokaty Narıman Kervenov rastady.

"Qorǵaýshy tarap Bas prokýratýradan áli jaýap alǵan joq. Toqmádı shartty túrde merziminen buryn bosatý týraly ótinishin keıin jazýdy josparlap otyr", – dedi advokat. 

Eske salaıyq, buǵan deıin advokat Anna Chernova Toqmádı jazasyn qysqartýdy surap jatqany týraly málim etken edi.

Zańgerdiń aıtýynsha, Toqmádı bul joly prokýratýra ózin aldaǵanyn jáne prosesýaldy ádiletsizdikke ushyraǵanyn alǵa tartqan. Alaıda Chernova qolyndaǵy qujattarǵa súıene otyryp, prokýratýranyń prosesýaldyq kelisim sharttaryn tolyq oryndaǵanyn málimdedi.

“Qasaqana tapsyryspen adam óltirý qylmysy úshin eń tómengi jaza retinde 10 jyl bas bostandyǵynan aıyrý jazasy taǵaıyndaldy. Keıin bul merzim taǵy da qysqardy. Endi buny qalaı jeńildetýge bolady? Qasaqana adam óltirý isterinde jeńil jaza múldem bolmaýy kerek”, – dep jazdy ol.

Anna Chernova bul iske qatysty sot prosesi 16 qańtar kúni Qonaev qalasynda ótetinin habarlap, ádil sheshim qabyldanatynyna senim bildirdi.

“Prezıdent Qasym-Jomart Toqaev aıtqandaı, ádildik, zań jáne tártip bárinen joǵary bolýy tıis. Bul joly da ádildik ornaıdy dep úmittenemiz”, – dedi zańger.

Eske salaıyq, 2004 jyly Erjan Tátishev basyna tıgen oqtan kóz jumǵan edi. Tergeý bankırdiń ańshylyq kezindegi "oqys jaǵdaıdan" qaza tapty degen qorytyndyǵa kelgen.

Kásipker Murathan Toqmádıge "Abaısyzda ólimge ákep soqtyrý" baby boıynsha aıyp taǵyldy. Sot ony bir jylǵa bas bostandyǵyn shekteý jazasyna kesti.

2017 jyly is qaıta qaraldy, Toqmádı bankırdi óltirgenin moıyndady. İs materıalyna sáıkes, ol marqumdy Muhtar Ábilázovtyń qysymymen óltirgen.

2018 jyldyń naýryz aıynda Toqmádı 10,5 jylǵa bas bostandyǵynan aıyryldy.