– Biz Taldyqorǵanda bılárdtan respýblıkalyq týrnırdi ekinshi jyl qatarynan ótkizip otyrmyz. Qatysýshylar sanynyń artyp kele jatqany bizdi qýantady. Bıylǵy jyly komandalar sany 13-ke jetti. Aldaǵy ýaqytta týrnır halyqaralyq deńgeıge kóterilip, bılárd sportyn jaqsy kóretin jandardy biriktirýge úles qosady dep oılaımyn. Qatysýshylardyń barlyǵyna oblys turǵyndary atynan alǵys aıtyp, oıynda sáttilik tileımin, – dedi A. Batalov.
Týrnırge qatysýshylar men qonaqtardy «Álem qyrandary» bılárdshylar qaýymdastyǵynyń prezıdenti, QR Eńbek sińirgen qaıratkeri, jazýshy Sádibek Túgel quttyqtap, bılárd sportyn damytýǵa qosqan úlesi úshin oblys ákimi Amandyq Batalovqa «Qurmetti bılárdshy» qurmetti ordenin taqty.
Saltanatty sharadan keıin týrnırdiń qatysýshylary men qonaqtary bılárd zalynda týrnırdi bastap ketti.
Atap ótsek, bıylǵy jyly jarysqa Nur-Sultan, Almaty, Shymkent qalalary men Almaty jáne Shyǵys Qazaqstan oblystarynan 13 komanda baq synaıdy.
Jarystar «Jastar» Sport saraıyndaǵy bılárd zalynda, «Elıt» jáne «Aıser» bılárd klýbtarynda 14 qyrkúıekke deıin jalǵasady.
Almaty oblysy ákiminiń baspasóz qyzmeti
