Búgin Qyrǵyzstan men Tájikstannyń áskeri kontingenti Brest oblysyndaǵy 61-shi jaýyngerlik aviatsiialyq bazasyna jetti. Bul týraly Belarýs Qorǵanys ministrliginiń baspasóz qyzmeti habarlady.
Reseilik basylymdarnyń aqparatynsha, «birlesken jáne arnaiy oqý-jattyǵýlarda Shyǵys Eýropa aimaǵyndaǵy daǵdarystyq jaǵdaidy retteý úshin Ujymdyq qaýipsizdik júiesiniń kúshteri men quraldaryn qoldaný pysyqtalady. Barlaý bólimderi «Izdeý – 2023» oqý-jattyǵýy sheńberinde iske qosylady, «Eshelon – 2023» oqý-jattyǵýy barysynda materialdyq-tehnikalyq qamtamasyz etý kúshteri men quraldarynyń is-qimyldary pysyqtalsa, «Tosqaýyl – 2023» arnaiy oqý-jattyǵýynda radiatsiialyq, himiialyq jáne biologiialyq qorǵaý men meditsinalyq qamtamasyz etýdi birlesip qalyptastyrý qurylady», – dep jazyp jatyr.
UQShU Birikken shtabynyń bastyǵy Anatolii Sidorov Ujymdyq sharty uiymynyń jattyǵýlaryna Qytai, Iran, Saýd Arabiiasy jáne Mońǵoliiadan baqylaýshylar shaqyrylatynyn aitty.
Ait keteiik, búginde Ujymdyq qaýipsizdik týraly shart uiymynyń Bas hatshysy qyzmetin Imanǵali Tasmaǵambetov atqaryp otyr.
Taiaýda ol Resei qorǵanys ministriniń orynbasary Aleksandr Fominmen kezdesken bolatyn. Olardyń kezdesýde ne týraly aitqany týraly tolyq málimet jariialanbady.
Tek «Dialog barysynda taraptar áskeri yntymaqtastyqtyń jáne UQShU sheńberindegi normativtik quqyqtyq bazany jetildirýdiń ózekti máselelerin talqylady» degen qysqa aqparat berildi.
Qazaq qoǵamy Resei Ýkrainaǵa basqynshylyq soǵysyn bastaǵaly Kreml «UQShU-ny Qańtar úshin qaryzyn óteýge mindettei me?» degen qorqynyshty suraqtan aryla qoiǵan joq.
Prezident Toqaev «qazaqtyń orystyń aldynda esh mindeti» joǵyn aityp, UQShU-nyń basta qalyptasqan ereje boiynsha ǵana áreket jasai alatynyn aityp, kóńildegi kúdikti seiltkendei boldy.
Biraq Imanǵali Tasmaǵambetovtyń buǵan deiin Batys elderiniń Ýkrainadaǵy jaǵdaidyń odan ári órshýine jol ashyp otyrǵanyn aitqany jelide gý-gý talqyǵa salynǵan.
– Ýkrainadaǵy jáne onyń ainalasyndaǵy qaqtyǵystarǵa aimaqtan tys kúshter belsendi aralasyp jatyr. Barǵan saiyn jetildirilgen jáne kúshti qarý júieleri jetkizilýde. Baltyq elderinde, Polshada jáne Qara teńiz aimaǵynda NATO-nyń áskeri áleýetiniń buryn-sońdy bolmaǵan artýy baiqalady, – dedi Tasmaǵambetov UQShU jiynyndaǵy sózinde.
Taǵyo qyńyz:
https://dalanews.kz/aimak/92161-astana-turgyndarynyng-zhumysqa-turuyn
