بۇگىن قىرعىزستان مەن تاجىكستاننىڭ اسكەري كونتينگەنتى برەست وبلىسىنداعى 61ء-شى جاۋىنگەرلىك اۆياسيالىق بازاسىنا جەتتى. بۇل تۋرالى بەلارۋس قورعانىس مينيسترلىگىنىڭ باسپا ءسوز قىزمەتى حابارلادى.
رەسەيلىك باسىلىمدارنىڭ اقپاراتىنشا، «بىرلەسكەن جانە ارنايى وقۋ-جاتتىعۋلاردا شىعىس ەۋروپا ايماعىنداعى داعدارىستىق جاعدايدى رەتتەۋ ءۇشىن ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارىن قولدانۋ پىسىقتالادى. بارلاۋ بولىمدەرى «ىزدەۋ – 2023» وقۋ-جاتتىعۋى شەڭبەرىندە ىسكە قوسىلادى، «ەشەلون – 2023» وقۋ-جاتتىعۋى بارىسىندا ماتەريالدىق-تەحنيكالىق قامتاماسىز ەتۋ كۇشتەرى مەن قۇرالدارىنىڭ ءىس-قيمىلدارى پىسىقتالسا، «توسقاۋىل – 2023» ارنايى وقۋ-جاتتىعۋىندا رادياسيالىق، حيميالىق جانە بيولوگيالىق قورعاۋ مەن مەديسينالىق قامتاماسىز ەتۋدى بىرلەسىپ قالىپتاستىرۋ قۇرىلادى»، – دەپ جازىپ جاتىر.
ۇقشۇ بىرىككەن شتابىنىڭ باستىعى اناتوليي سيدوروۆ ۇجىمدىق شارتى ۇيىمىنىڭ جاتتىعۋلارىنا جۇڭگو، يران، ساۋد ارابياسى جانە موڭعوليادان باقىلاۋشىلار شاقىرىلاتىنىن ايتتى.
ايت كەتەيىك، بۇگىندە ۇجىمدىق قاۋىپسىزدىك تۋرالى شارت ۇيىمىنىڭ باس حاتشىسى قىزمەتىن يمانعالي تاسماعامبەتوۆ اتقارىپ وتىر.
تاياۋدا ول رەسەي قورعانىس ءمينيسترىنىڭ ورىنباسارى الەكساندر فومينمەن كەزدەسكەن بولاتىن. ولاردىڭ كەزدەسۋدە نە تۋرالى ايتقانى تۋرالى تولىق مالىمەت جاريالانبادى.
تەك «ديالوگ بارىسىندا تاراپتار اسكەري ىنتىماقتاستىقتىڭ جانە ۇقشۇ شەڭبەرىندەگى نورماتيۆتىك قۇقىقتىق بازانى جەتىلدىرۋدىڭ وزەكتى ماسەلەلەرىن تالقىلادى» دەگەن قىسقا اقپارات بەرىلدى.
قازاق قوعامى رەسەي ۋكرايناعا باسقىنشىلىق سوعىسىن باستاعالى كرەمل «ۇقشۇ-نى قاڭتار ءۇشىن قارىزىن وتەۋگە مىندەتتەي مە؟» دەگەن قورقىنىشتى سۇراقتان ارىلا قويعان جوق.
پرەزيدەنت توقايەۆ «قازاقتىڭ ورىستىڭ الدىندا ەش مىندەتى» جوعىن ايتىپ، ۇقشۇ-نىڭ باستا قالىپتاسقان ەرەجە بويىنشا عانا ارەكەت جاساي الاتىنىن ايتىپ، كوڭىلدەگى كۇدىكتى سەيلتكەندەي بولدى.
ءبىراق يمانعالي تاسماعامبەتوۆتىڭ بۇعان دەيىن باتىس ەلدەرىنىڭ ۋكرايناداعى جاعدايدىڭ ودان ءارى ورشۋىنە جول اشىپ وتىرعانىن ايتقانى جەلىدە گۋ-گۋ تالقىعا سالىنعان.
– ۋكرايناداعى جانە ونىڭ اينالاسىنداعى قاقتىعىستارعا ايماقتان تىس كۇشتەر بەلسەندى ارالاسىپ جاتىر. بارعان سايىن جەتىلدىرىلگەن جانە كۇشتى قارۋ جۇيەلەرى جەتكىزىلۋدە. بالتىق ەلدەرىندە، پولشادا جانە قارا تەڭىز ايماعىندا ناتو-نىڭ اسكەري الەۋەتىنىڭ بۇرىن-سوڭدى بولماعان ارتۋى بايقالادى، – دەدى تاسماعامبەتوۆ ۇقشۇ جيىنىنداعى سوزىندە.
تاعىو قىڭىز:
https://dalanews.kz/aimak/92161-astana-turgyndarynyng-zhumysqa-turuyn
