Úsh kólikpen saparǵa shyqqan 10 azamat 18-shi ǵasyrdaǵy «Kókshetaý-Aqmola-Ulytaý-Túrkistan» kerýen jolymen myńdaǵan shaqyrym jol júrip, qazaq dalasynyń tarıhyn zerttegen. Túrkistan oblysy ákimdiginde ótken jıynda joba jetekshisi Murat qajy Ydyrysuly bul is-sharanyń maqsaty týraly keńinen aıtyp berdi.
– «Abylaıhannyń qara joly» jobasynyń ata-babalar tarıhyn jańǵyrtýdaǵy mańyzy zor. Bizdiń tobymyzda tarıhshy, geograf, ólketanýshy ǵalymdar men tilshiler jáne zıaly qaýym ókilderi bar. Olar jol boıyndaǵy aýyldarǵa soǵyp, ańyz-áńgimeler jınap, sapar barysynda kezdesken tarıhı oryndardy belgilep, qaǵazǵa túsirdi. Sapar qorytyndysy boıynsha ǵylymı maqalalar jaryq kóredi. Ekspedısıa búgin Abylaı han máńgi qonys tepken uly shahar – Túrkistanǵa kelip otyr. Túrkistan oblysy qurylyp, shejireli qalanyń jańa dáýiri bastalyp jatyr eken. Sizderdi osy qýanyshty oqıǵamen quttyqtaımyn. Túrkistannyń qazaq tarıhynda orny erekshe, – dedi ekspedısıa jetekshisi.
Jıynda ekspedısıanyń ózge qatysýshylary da tarıh, ólketaný jóninde keleli oılaryn aıtyp, Túrkistan qalasynyń bolashaǵy jarqyn bolatynyna senimderin bildirdi. Óz kezeginde Q.A.Iasaýı atyndaǵy HQTÝ-niń oqytýshysy Gaýhar Pirimbetova Abylaı hannyń qara joly soltústik pen ońtústikti baılanystyrǵan eń tóte jol bolǵandyǵyn jetkizdi.
– Han ony saıası jáne ekonomıkalyq múddede paıdalanǵan. Jalpy Abylaıǵa qatysty «Abylaıdyń qara joly», «Abylaıdyń qara qosy» degen uǵymdar kúni búginge deıin urpaqtar sanasynda jańǵyra otyryp jetken. «Qara» degen sózdiń ózi qazaq tilinde «qasıetti», «kóne», «úlken», taǵy basqa maǵynalardy beretinin eskersek, «Abylaıdyń qara joly» tirkesiniń maǵynasyn – jalpyǵa málim dańǵyl kerýen joly dep túsinýge bolady, – dep atap kórsetti ol.
Osy ekspedısıada aıasynda topografıalyq karta daıyndalmaq. Al, sapardan soń Kókshetaýda respýblıkalyq ǵylymı-tájirıbelik konferensıa ótkizý josparlanyp otyr.
Túrkistan oblysy ákiminiń baspasóz qyzmeti
