Búginde saıabaqtyń jalpy aýmaǵy – alty jarym gektardy quraıdy. Saıabaqtyń eskızdik jobasyn»Tabys Joba» jaýapkershiligi shekteýli seriktestigi ázirlegen. Jobanyń jalpy smetalyq quny 403,9 mıllıon teńgeni quraıdy. Saıabaq aýmaǵynda batyrdyń aty jazylǵan kireberis taqtasy jáne naqyl sózder, Halyq qaharmany Qaırat Rysqulbekovtyń eskertkishi, «Jeltoqsan-86» ortalyǵy, «Táýelsizdik ushqyny» aleıasy, qaıta jańǵyrtýdan ótken «Ardagerler úıi» jáne «Ǵıbrat» ortalyǵy, «Shahmat» alańy, balalar jáne sporttyq alańshalary ornalasqan.
Saltanatty sharaǵa jıylǵan qonaqtar áýeli Halyq qaharmany Qaırat Rysqulbekovtiń jańartylǵan eskertkishiniń ashylýyna qatysty.
Eskertkishti ashý úshin Qazaqstan Jazýshylar odaǵynyń múshesi, dramatýrg Elen Álimjan, «Patrıottyq qozǵalys «Jeltoqsan aqıqaty» respýblıkalyq qoǵamdyq birlestiginiń múshesi Murat Berdalıev, Qaırat Rysqulbekovtiń ápkesi Gúlnar Rysqulbekova shaqyryldy.
Shaqyrylǵan qonaqtar kezekpen sóz alyp, batyr uldyń ult tarıhynda qalǵan orny men el táýelsizdigin alý jolynda jasaǵan kózsiz erligi jaıly áńgime órbitti.
Sonan soń qonaqtar Halyq qaharmany Qaırat Rysqulbekovke taǵzym etip, eskertkishine gúl shoqtaryn qoıdy.
Eskertkishtiń ashylýynan soń qonaqtar «Jeltoqsan-86» ortalyǵynda boldy.
Esterińizge sala keteıik, atalmysh eskertkishten bólek búgin qala kóleminde Jambyl aqynnyń eskertkishi, oblys ákimdiginiń ǵımaraty mańynda jáne ortalyq «Dostyq» alańynda túrli-tústi sazdy áýen yrǵaǵymen oınaıtyn tórt sýburqaq paıdalanýǵa berildi.
Jeńis saıabaǵynda ornalasqan «Tyl eńbekkerlerine», «Aýǵan soǵysynyń ardagerlerine», «Chernobyl apatyna qatysýshylarǵa» arnalǵan eskertkishter ashylady.
Sondaı-aq, búgin qalamyzda «Jeltoqsan tolqyny» ataýymen elimizdegi eń uzyn ári maǵynasy zor sýburqaq, tolyq qaıta jańǵyrtýdan ótken Qaırat Rysqulbekov atyndaǵy saıabaǵynda, Jeltoqsan oqıǵasyna qatysýshylarǵa arnalǵan «Táýelsizdik ushqyny aleıasy», «Ǵıbrat» ortalyǵy ashylmaq.
Sonymen qatar, tarazdyqtar «Úshbulaq» jaǵalaýyndaǵy demalys aýmaǵynyń ashylýyn tamashalaıdy.
08 INFO
