Prezidenti ákimshiliginiń kelisimimen Túrkistan oblysy ákiminiń orynbasary laýazymyna Talǵat Japarhanuly Qozbekov taǵaiyndaldy, dep habarlaidy Dalanews.kz
Vedomstvonyń remi saityndaǵy málimetke súiensek, Túrkistan oblysynyń ákimi Nuralhan Kósherov oblys aktivine jańa orynbasaryn tanystyryp, óńirdi damytý baǵytynda mańyzdy mindetter júktelip otyrǵanyn aitty. Aldaǵy jumysyna sáttilik tiledi.
Talǵat Qozbekov 1976 jyly Taldyqorǵan oblysy Panfilov aýdany Kóktal aýylynda dúniege kelgen. Abai atyndaǵy Almaty memlekettik ýniversitetin "Ekonomist-marketolog" jáne Al-Farabi atyndaǵy Qazaq Ulttyq Ýniversitetin "Zańger" mamandyqtary boiynsha bitirgen.
Eńbek jolyn 1999 jyly Panfilov aýdany boiynsha salyq komitetiniń Salyq aýditi bóliminde salyq inspektory laýazymynan bastaǵan. Ár jyldary bólim basshysy, basqarma basshysynyń orynbasary, Panfilov aýdany boiynsha memlekettik kirister basqarmasynyń basshysy laýazymdaryn atqardy.
2020 jyldan bastap Atyraý oblysy boiynsha Memlekettik kirister departamenti basshysynyń orynbasary laýazymynda jáne Almaty oblysy boiynsha Memlekettik kirister departamentiniń basshysy bolyp qyzmet etti.
2022 jyldyń qyrkúiek aiynan beri Jetisý oblysy boiynsha Memlekettik kirister departamentiniń basshysy qyzmetin atqaryp keldi.
Talǵat Qozbekov oblys ákiminiń orynbasary retinde Kásipkerlik jáne ónerkásip, Qurylys, Memlekettik satyp alý, Qarjy jáne memlekettik aktivter, Ekonomika jáne biýdjettik josparlaý basqarmalarynyń jumystaryna jetekshilik etetin bolady.
Túrkistan oblysy ákiminiń orynbasary Talǵat Qozbekov ózine artylǵan senim úshin alǵysyn bildirip, osyǵan deiin jinaǵan bilimi men tájiribesin oblysty damytýǵa jumsaýǵa daiyn ekenin jetkizdi.
