Memleket basshysy búgingi Joldaýda tereń óńdeý tásilderin meńgerý qajet ekenin erekshe atap ótken edi. Investor tartyp, aimaqtardy órkendetý úshin qandai áreket jasalýy keregin Bal Tekstil kilem fabrikasynyń bas direktory Talǵat Ysqaqovtan suradyq.
Kásipkerdiń aitýynsha, otandyq óndiristi damytyp, investor tartý úshin birinshi kezekte ishki naryqty qorǵaý qajet. «Mysaly kórshiles Ózbekstanda ishki naryq qorǵalǵandyqtan, óndirisi jaqsy damyp jatyr. Ol jaqta shetelden keletin daiyn ónimderge kedendik baj salyǵy joǵary. Al bizde importtyq taýarlarǵa baj salyǵy tómen. Osy sebepti bizge shetelden daiyn ónim ákelip satqan tiimdi. Otandyq óndiristi damytyp, óz buiymdarymyzdy shyǵarý qiyn. Sheteldik óndirýshilermen básekelesý ońai emes. Sondyqtan ózimizden shyǵatyn ónimderdiń sheteldik balamasy bolsa, jolyna aktsiz ne qosymsha salyq sekildi kedergi qoiý kerek. Ony belgili bir merzimge, 5-10 jylǵa qoisa bolady. Iaǵni bastysy aiaqqa turyp ketýge kómektesý qajet» deidi Talǵat Ysqaqov.
«Jalpy alǵanda bizde memleket tarapynan otandyq óndirýshilerge qoldaý jaqsy. Jeńildetilgen nesieler, jer telimderi — bári bar. Jetpei turǵany — ishki naryqty qorǵaý ǵana. Osy áreket bolmaǵandyqtan, investorlar qyzyqpaidy. Kelesi bir aitatyn jait: shikizat kúiinde shetelge satýǵa tyiym salǵan jón. Máselen ońtústikte maqta egiledi. Sony shikilei satýǵa tyiym salý kerek. Sonda ǵana maqtadan — jip, jipten mata jasalady. Sol kezde memleketten tikelei qoldaý kerek bolady. Qolda bar zatty tereńdetip óńdeýge múmkindik qajet».
