Qazaqstanda otandyq taýar óndirýshilerdi qoldaýǵa baǵyttalǵan jańa bastama ázirlendi, dep habarlaidy Dala News.
Saýda jáne integratsiia ministrligi saýda jelilerinde qazaqstandyq jańa brendterge jeńildetilgen sharttarmen oryn berý tetigin kózdeitin túzetýler jobasyn daiyndady. Qujatqa sáikes, taýar óndirýshiler tizilimine engizilgen jańa otandyq brendter óz ónimin dúken sórelerine keminde úsh ai merzimge jeńildikpen ornalastyra alady. Ol úshin óndirýshi tarapynan jazbasha ótinim berý jetkilikti.
Sonymen qatar, jańa erejeler saýda sýbektilerine jabdyqtardy, taýarlar men shikizatty otandyq kásipkerlerden satyp alý talabyn bekitýdi qarastyrady. Bul ishki óndiristiń júktemesin arttyryp, jergilikti biznestiń naryqtaǵy úlesin keńeitýge múmkindik bermek.
Túzetýler jobasynda taǵy bir mańyzdy shekteý engiziledi. Sýbsidiialaý jáne kreditterdi kepildendirý týraly shart jasalǵannan keiin bir jyl ishinde jaldaý aqysyn ósirýge tyiym salý usynylyp otyr. Bul shara kásipkerlerdi kútpegen shyǵyndardan qorǵaýǵa baǵyttalǵan.
Qujat 2026 jylǵy 20 aqpanǵa deiin qoǵamdyq talqylaýǵa shyǵaryldy. Ministrliktiń málimetinshe, usynystar men eskertpeler eskerilgennen keiin túpkilikti sheshim qabyldanady.
