“Astana EKSPO-2017” ulttyq kompaniiasynyń burynǵy basshysy Talǵat Ermegiiaev shartty túrde merziminen buryn bosatýǵa ótinish bergenimen, Almaty qalasynyń Alataý aýdandyq soty onyń bul talabyn qanaǵattandyrmady, dep habarlaidy Dalanews.kz.
Eks-sheneýnik 15 jylǵa bas bostandyǵynan aiyrylyp, búginde jazasynyń 9 jylyn ótegen. Bul jalpy merzimniń úshten eki bóligin quraidy. Osyny negizge alǵan Ermegiiaev shartty túrde bosatýǵa niet bildirgen.
Sot otyrysynda jazasyn óteý mekemesiniń ókili Ermegiiaevtiń tártipti tutqyn ekenin atap ótti. Ol ishki erejelerdi buzbaǵan, qoǵamdyq jumystarǵa belsene aralasqan jáne otbasy bailanysyn úzbegen. Sondai-aq segiz márte marapat alyp, úshinshi deńgeili oń minez-qulyq sanatyna engen.
Advokattarynyń aitýynsha, Ermegiiaev qoǵamǵa eshqandai qaýip tóndirmeidi jáne tipti paidaly bolýy múmkin. Burynǵy basshy memleketke keltirilgen zalaldy ishinara ótep, 935 million teńgeden astam qarjyny qaitarǵan.
Degenmen prokýror ótinishti qoldaýdan bas tartyp, zalaldyń tolyq ótelmegenin jáne shyǵyndy jabýǵa naqty qadam jasalmaǵanyn alǵa tartty.
Nátijesinde sot Ermegiiaevtiń merziminen buryn bosatylýyna ruqsat bermedi. Atalǵan sheshim áli zańdy kúshine engen joq.
Aita keteiik, buǵan deiin 14 jylǵa bas bostandyǵynan aiyrylǵan burynǵy ulttyq kompaniia basshysy Talǵat Ermegiiaevtiń uly – Mádi Ermegiiaev jurtshylyqqa jáne memleket basshysyna úndeý jasaǵan edi.
Mádi Ermegiiaevtiń aitýynsha, otbasy on jyl boiy ádilet izdep, úmitpen ómir súrip keledi.
“Ákem urlyq jasap baiyǵan joq. Kerisinshe, ol memleket qarjysyn qorǵaýǵa tyrysqany úshin sottaldy. Ahmet Baitursynuly aitqandai, «aq qaǵazǵa qara siiamen jazylǵan shyndyqty qyzyl tilmen kómip tastai almaisyń». Biz búgin sol shyndyqty ashý úshin jinaldyq. Ákem osy ýaqyt ishinde týǵan-týystarynan jyraqta, temir tordyń ar jaǵynda ómir súrdi. Balalarynyń balalyq shaǵy men nemereleriniń dúniege kelý sátterin kóre almady1, – dedi ol.
Mádi anasynyń densaýlyǵyna alańdaýly ekenin de aitty.
"Anamyz uzaq jyldan beri sirek kezdesetin aýtoimmýndy aýrýmen – tórtinshi dárejeli ókpe sarkoidozymen kúresip keledi. Bul dert oǵan kúizelistiń saldarynan kelgen. Sońǵy eki jylda ol tek ottegi apparatymen tynys alyp, kún saiyn ókpeniń jumysyn qoldaityn gormonaldy dáriler iship júr. Ol kún saiyn kúieýiniń bostandyqqa shyǵyp, otbasyna oralǵanyn tilep, duǵa etedi. Ákemniń ata-anasy da jasy kelip qalǵan shaqta jalǵyz ulyn taǵatsyzdana kútip otyr. Olar úmitin úzbei, onyń aman-esen oralýyn kútýde. Ákem 14 jyldyq jaza merziminiń 10 jylyn ótep úlgerdi. Ol zańdy qorǵaýdy tańdady, únsiz qalǵan joq. Memleket múddesi úshin áreket etti. Alaida onyń áreketi úshin oǵan qysymmen qoldan jasalǵan aiyp taǵyldy. Endi bizde shyndyq pen ádilettilikke bastar naqty bir qadam jasaýǵa múmkindik bar — dálelsiz, qisynsyz, shyndyqqa janaspaityn isti qaita qaraý", – dedi Mádi.
Mádi Ermegiiaev ádilet – tek bir otbasynyń ǵana kúresi emes ekenin atap ótti.
"Prezidentimiz aitqandai, jańa Qazaqstan – bul eń aldymen ádiletti Qazaqstan. Bul – bir otbasynyń ǵana emes, barsha halyqtyń ádiletke degen seniminiń synaǵy. Sondyqtan da bei-jai qaramaityn barsha azamattarǵa úndeý jasaimyn: bul isti zertteńizder, bólisińizder, aityp júrińizder. Sebebi ádilet úshin únsizdik – ádiletsizdikke seriktes bolý degen sóz. Ákemniń bostandyqqa shyǵýy – tek otbasymyzdyń armany emes, bul eldegi ádildiktiń ornaýyna jasalǵan naqty qadam bolady.
Mádi Ermegiiaev Memleket basshysy Qasym-Jomart Toqaevqa arnaiy úndeý jasap, kómek surady.
"Qurmetti Qasym-Jomart Kemeluly, men, Ermegiiaev Mádi, sizge el Konstitýtsiiasynyń kepili retinde júginemin. Ákem Talǵat Ermegiiaev jazyqsyz on jylǵa jýyq ýaqyt túrmede otyr. Osy jyldar boiy ol otbasymen birge bola almady: balalary ósti, nemereleri dúniege keldi, ata-anasy qartaidy, anamyz aýyr dertke shaldyqty. Sizdiń ádilet pen adamgershilikke negizdelgen ustanymyńyz úshin alǵys aita otyryp, osy iske nazar aýdaryp, ádil sheshim shyǵarýǵa yqpal etýińizdi suraimyn", – dedi ol.
Aita keteiik, 2016 jyldyń tamyzynda Astana qalasynyń qylmystyq ister jónindegi aýdanaralyq mamandandyrylǵan soty «Astana EKSPO-2017» ulttyq kompaniiasynyń burynǵy basshysy Talǵat Ermegiiaevti 14 jylǵa bas bostandyǵynan aiyrǵan bolatyn.
