Talǵarda 16 jastaǵy Sherzat Bolattyń ólimine kúdikti jeti adamnyń uiymdasqan qylmystyq topqa qatysy bar degen aqparat shyndyqqa janaspaityn bolyp shyqty, dep habarlaidy Dalanews.kz.
Almaty oblystyq politsiia departamenti bastyǵynyń mindetin atqarýshy Serik Shalharov bul málimdemeni rastady.
Onyń aitýynsha, uiymdasqan qylmystyq top degen naqty túsinik bar jáne ol birneshe ret qylmys jasaǵan adamdardy qamtýy kerek.
“Bul jerde bir ǵana oqiǵa oryn alǵandyqtan, kúdiktilerdi uiymdasqan toptyń músheleri dep aitýǵa negiz joq. Sonymen qatar áleýmettik jelilerde taraǵan “Hýtorskiiler” týraly aqparatqa da túsinikteme berildi. Keńes zamanynda osylai atalǵan “Hýtorskaia” aýdany qazirgi ýaqytta “Birlik” dep atalady. Degenmen sol aýdannyń barlyq turǵynyn qylmystyq top músheleri dep aiyptaýǵa bolmaidy. Bizde mundai toptar joq”, – dedi Shalharov.
Onyń sózinshe, tergeý barysy týraly málimetter jariialanbaidy, sebebi sotqa deiingi tergep-tekserý kezinde aqparatty taratýǵa tyiym salatyn qylmystyq-protsestik kodekstiń baptary bar. Sondai-aq ustalǵandardyń arasynda quqyq qorǵaý organdary nemese memlekettik mekemelerde qyzmet atqaratyn laýazymdy tulǵalarynyń balalary joq ekeni atalyp ótti.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
Sonymen qatar, Almaty oblystyq politsiia departamenti bastyǵynyń mindetin atqarýshy Shalqarov tóbelesten keiin qansha qarý tárkilengenin aitty.
"Qazirgi tańda úsh pyshaq tárkilendi. Onyń ekeýi as úi pyshaǵy. Sondai-aq bir myltyq bar. Qarý eshqaida tirkelmegen. Departament ony saraptamadan ótkizip jatyr", - deidi Serik Shalqarov.
