Qazaqstandyq zańger, azamattyq belsendi Álnur Iliashev “Hýtor” bandasy jaily sóz qozǵady, dep habarlaidy Dalanews.kz.
Aitýynsha, mundai qylmystyq toptar Qazaqstanda ǵana emes, álemniń túkpir-túkpirinde kezdesedi.
“Sońǵy aqparattarǵa súiensek, on birinshi kúdikti qolǵa túsipti. Onyń teginiń alǵashqy árpi Hasan Qasymbaevpen sáikes keledi dep jatyr. Biraq ol rasymen Qasymbaevtar áýletiniń biri me, álde joq pa, belgisiz. Meniń oiymsha, bul azamattar toby nemese osy toptyń ataýy belgili bir aimaq pen burynǵy ataýǵa bailanysty paidalanylǵan. Bul – Almatyda burynnan bar, iaǵni jastardyń beiresmi toptaryn jergilikti erekshelikter boiynsha bóletin dástúrdiń kórinisi.
Meniń oiymsha, osy iste esimderi atalyp jatqan baýyrlar jas kezderinde “Hýtorskie” dep atalyp kelgen. Almatyda, Kazanda, Keńes odaǵy kezinde de osyǵan uqsas áleýmettik toptar bolǵan. Bul tek Qazaqstanda emes, álemniń kóp jerlerinde bar”, - dedi ol Giperborei YouTube arnasyna bergen suqbatynda.
Onyń sózinshe, búginde jurt olardyń áreketin ótken kúnderdiń tarihymen bailanystyryp otyr.
“Al qazirgi ýaqytta adamdar ótken kúnderdiń ataq-dańqtaryna nazar aýdaryp otyr. Olar kezinde ózderin myqty ári sózderinde salmaǵy bar azamat retinde jáne jas jigitterge qoldaý kórsete alatyn top retinde tanytqan. Mine, osy áreketteriniń sońy osyndai saldarǵa ákeldi. Bir baýyryn memlekettik qyzmetten shettetti. Ekinshisin, bálkim, ustap ta alǵan shyǵar. Bunyń qaida baǵyt alatynyn kóremiz. Máselen, Talǵar aýdanynyń turǵyndarynyń biri jaǵdaiymyz jaqsy dese, endi biri atalmysh top turǵyndardy úreide ustap otyr dep dabyl qaǵýda”, - deidi zańger.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
15 qazanda Ishki ister vitse-ministri taǵy úsh kúdiktini ustaǵanyn málim etti.
Al 18 qazanda taǵy bir kúdiktini qolǵa túsirdi.
Sonymen qatar, Almaty oblystyq politsiia departamenti bastyǵynyń mindetin atqarýshy Shalqarov tóbelesten keiin qansha qarý tárkilengenin aitty.
Odan keiin Sherzattyń úiine kúzet qoiyldy.
Kóp uzamai marqum Sherzattyń úii órtendi.
Buǵan deiin álemjelide osy qylmystyq iske “Hýtor” bandalarynyń qatysy bar degen alyp-qashpa áńgime taraǵan edi. Túrli derekkóz onyń basshysy retinde Hasan Qasymbaev esimdi azamatty kórsetken. Alaida Qasymbaev álemjelide tarap jatqan aqparattaodyń jalǵan ekenin ári ózine jala jabylyp jatqanyn alǵa tartty.
“Banda, OPG dep jatyr, ondaiǵa esh qatysym joq. Zań aldynda eshqandai másele bolmaǵan, sottalmaǵanmyn. Árine, inisi sottalǵan dep aityp jatyr. Inim 2017 jyldan beri jazasyn ótep jatyr. Sondyqtan jalǵan aqparat taratpaýlaryńyzdy suraimyn.
Advokat jaldadym, jalǵan aqparat taratqan tulǵalardyń bárin zań boiynsha jaýap berýin suraimyn. Men týraly aitylyp jatqan aqparat kóp, zań boiynsha aryzdaryn jazsyn. Qylmyskerler ustalyp, zań boiynsha jazalaryn alady dep oilaimyn”, – dedi Hasan Qasymbaev óz úndeýinde.
Aita keteiik, Hasan Qasymbaev óziniń ar-namysy men abyroiyn qorǵaý maqsatynda marqum balanyń ákesine jáne taǵy basqa tulǵalarǵa qarsy aryz daiyndap, Talǵar aýdandyq sotyna tapsyrǵanyn habarlaǵan edik.
Hasannyń aitýynsha, onyń atyna taǵylǵan aiyptar men qoǵamdaǵy áńgimeler shyndyqqa janaspaidy. Ol qarapaiym turmystyq tóbelesti uiymdasqan qylmystyq toptardyń arasyndaǵy qaqtyǵys retinde kórsetýge tyrysyp jatyr degen pikirde.
Kasymbaevtyń pikirinshe, ony atyshýly qylmystyq toppen bailanystyrý negizsiz. Álgi aryzda ol eshqashan kisi óltirýge qatysty jastardy kórmegenin, bilmegenin jáne olardyń áreketterine eshqandai qatysy joq ekenin málimdegen.
