Almaty oblysy Talǵar aýdanynda josparlanǵan egistik alqaby shamamen 20 myń gektardy quraidy. Onyń ishinde shamamen 50%-y dándi daqyldarǵa, 1800 gektarǵa jýyǵy maily daqyldarǵa, 700 gektarǵa jýyǵy kartopqa, 900 gektardan astamy kókónis daqyldaryna, 100 gektary baqtarǵa, al mal azyǵy daqyldaryna shamamen 5700 gektar bólingen, – dep habarlaidy Dalanews.kz
Biylǵy jyldyń naýryz aiynan bastap alqaptarda 12 myń gektar aýmaqta tyrmalaý jáne ylǵal saqtaý sharalary júrgiziledi. Jer jyrtýǵa 7400 gektarǵa jýyq jer bólinse, sebý aldyndaǵy óńdeý 13 myń gektardan astam aýmaqta josparlanǵan.
Kúzdik dándi daqyldar shamamen 3 myń gektardy alyp jatyr jáne olardyń jaǵdaiy qanaǵattanarlyq. Kóktemgi naýqandy júrgizý úshin agrarshylar 600-den astam traktordan turatyn aýyl sharýashylyǵy tehnikasyn daiyndady, oǵan tirkemeler, soqalar, kýltivatorlar, sepkishter jáne basqa da jabdyqtar kiredi. Sharýashylyqtarda 18 mln teńge turatyn eki jańa traktor iske qosyldy, sondai-aq Lovol markaly tórt tehnikany lizingke alý rásimdelýde.
Ótken jyly aýdan aýyl sharýashylyǵy tehnikasyn jańartty: jalpy quny 500 mln teńgeden asatyn 47 tehnika satyp alyndy. Biylǵy maýsymda 12 sharýashylyq shamamen 800 tonna dizel otynyna suranys berdi, bul rette «Petrofon» kompaniiasymen tiisti kelisimder jasalyp jatyr.
Fermerler 860 tonnadan astam mineraldy tyńaitqyshtarǵa tapsyrys berdi, jetkizýshiler «QazAzot», «QazFosfat», «AgroMart» jáne «Álem Agro» kompaniialarymen kelisimsharttar jasaldy. «Keńdala» jeńildetilgen nesieleý baǵdarlamasy aiasynda iri jáne shaǵyn fermerlik sharýashylyqtar 211 mln teńgeden astam somaǵa ótinimder tapsyrdy.
Talǵar aýdanynda sýarý júiesine erekshe nazar aýdarylady. Negizgi sý jetkizýshiler – jergilikti sý sharýashylyǵy óndiristik basqarmasy jáne D.Qonaev atyndaǵy Úlken Almaty kanaly. Ótken jyly úsh kanaldyń qaita qurý jumystaryna 1 mlrd teńgeden astam qarajat bólindi.
Biylǵy jyldyń aqpan aiynda ótken aýyl sharýashylyǵy oqýlary aiasynda egistik naýqanyna daiyndyq jáne zamanaýi tehnologiialardy, ásirese sý únemdeý salasyndaǵy tehnologiialardy engizý máseleleri talqylandy. Qazirgi ýaqytta 22,6 myń gektar sýarmaly jerdiń 4,6 myń gektary zamanaýi tehnologiialarmen jabdyqtalǵan, aldaǵy jyldary bul aýmaq aitarlyqtai ulǵaitylmaq.
«Nurbekov» fermerlik sharýashylyǵy «Spetskonstrýktsiia» kompaniiasymen aldyńǵy qatarly sýarý júielerin ornatý jóninde kelisim jasady. Basqa sharýashylyqtar da sý únemdeý tehnologiialaryn keńeitý maqsatynda jańǵyrtý baǵdarlamasyna qosylýda.
