Taldyqorǵan qalalyq máslihatynyń depýtaty, "Amanat" partiiasynyń múshesi Jarylqasyn Bolatuly asa iri kólemdegi alaiaqtyq jasaǵany úshin 6 jyl 8 aiǵa bas bostandyǵynan aiyryldy. Bul týraly jýrnalist Mihail Kozachkov málimdedi, dep habarlaidy dalanews.kz.
Almaty qalasynyń Medeý aýdandyq sotynda qaralǵan is materialdaryna sáikes, depýtat elitalyq aýdanda ornalasqan turǵyn úiin birneshe adamǵa satyp, zańsyz paida tapqan.
Alǵashqy satyp alýshydan kepilaqy alyp, aqshany qaitarmaǵan
Tergeý málimetinshe, 2025 jyldyń aqpanynda Bolatuly úidi satýǵa kelisip, alǵashqy satyp alýshydan 10 million teńge kóleminde kepilaqy alǵan. Alaida ol baspananyń «qyzyl syzyq» aýmaǵynda ornalasqanyn, iaǵni bolashaqta súrilýi múmkin ekenin jasyrǵan. Sonyń saldarynan mámile júzege aspai qalǵan.
Jýrnalist Mihail Kozachkovtyń jazýynsha, kelisim buzylǵannan keiin depýtat kepilaqyny qaitarmaǵan.
"Ol satyp alýshynyń telefon nómirin buǵattap, qońyraýlary men habarlamalaryna jaýap berýdi doǵarǵan", – dep jazdy Mihail Kozachkov.
Ekinshi satyp alýshy bank aldyndaǵy qaryzdy ótegen
Keiin úidi satyp alýǵa taǵy bir adam niet bildirgen. Bul joly depýtat jyljymaityn múliktiń bank kepilinde turǵanyn aityp, mámileni rásimdeý úshin aldymen 116 million teńge kólemindegi bereshekti jabý qajet ekenin túsindirgen.
Satyp alýshy atalǵan somany bankke aýdaryp, keiin qalǵan 3 million teńgeni depýtattyń ózine bergen. Óz kezeginde ol úidiń túpnusqa qujattaryn alǵan. Alaida keiinirek úige bankten bólek taǵy birneshe tyiym salynǵany anyqtalyp, mámileni aiaqtaý múmkin bolmaǵan.
Úi úshinshi adamǵa da satylǵan
Tergeý nusqasyna sáikes, bank kepili alynǵannan keiin Jarylqasyn Bolatuly qujattardyń telnusqasyn rásimdep, sol úidi úshinshi adamǵa da satyp jibergen.
"Osylaisha is boiynsha taǵy bir jábirlenýshi paida boldy", – deidi Mihail Kozachkov.
Sottaǵy ýáji jáne úkim
Sot barysynda depýtat óz kinásin moiyndamaǵanymen, satyp alýshylardan aqsha alǵanyn rastaǵan. Onyń aitýynsha, bul qarajat "Aisýlý" tigin fabrikasyna salynǵan.
Birinshi satyp alýshy ózin qorlaǵandyqtan onymen bailanysyn úzgenin, al ekinshi satyp alýshy bankke qatysty máselelerdi óz betinshe sheshýi tiis bolǵanyn alǵa tartqan. Sonymen qatar jábirlenýshilerge keltirilgen shyǵynnyń ótelgeni belgili boldy.
Úkim shyǵarý kezinde sýdia Jasulan Hýsainov:
"Sottalýshynyń túzelýi tek qoǵamnan oqshaýlaý arqyly múmkin", – degen qorytyndyǵa kelgen.
Osyǵan bailanysty sot Jarylqasyn Bolatulyn ortasha qaýipsizdik mekemesinde 6 jyl 8 ai merzimge bas bostandyǵynan aiyrý týraly úkim shyǵardy.
Úkim zańdy kúshine engen joq.
