Almaty garnizonynyń áskeri soty Taldyqorǵan garnizonyndaǵy áskeri bólimderdiń birinde merzimdi qyzmettegi sarbazdyń qaza bolýyna qatysty qylmystyq isti qaraýdy aiaqtady, dep habarlaidy dalanews.kz.
Bas áskeri prokýratýranyń málimetinshe, 2025 jylǵy 23 qyrkúiekte áskeri qyzmetshiler qarýǵa tehnikalyq qyzmet kórsetý kezinde pýlemetten abaisyzda oq atylyp ketken. Sonyń saldarynan oq jaraqatyn alǵan qatardaǵy jaýynger Seiitqali Á. kóz jumǵan.
Prokýratýra ókilderi tergeý barysynda oqiǵanyń barlyq mán-jaiyn anyqtaýǵa jáne dáleldemelerdi jinaýǵa baǵyttalǵan qajetti tergeý jáne protsessýaldyq áreketter tolyq júrgizilgenin málimdedi.
Tergeý kezinde batalon komandiriniń orynbasary qarýmen jumys isteý kezindegi qaýipsizdik talaptarynyń saqtalýyn qamtamasyz etpegeni anyqtalǵan. Sondai-aq ol aldyńǵy kúni ótken atys jattyǵýlarynan keiin qarýdy tolyq tekserýdi uiymdastyrmaǵan.
Sonyń saldarynan pýlemet uńǵysynda qalyp qoiǵan oq keiin sarbazdyń ólimine ákelgen.
«Sot talqylaýynyń qorytyndysy boiynsha atalǵan laýazymdy tulǵa Qylmystyq kodekstiń 453-babynyń 2-bóligimen (qyzmetke salǵyrt qaraý, aýyr zardaptarǵa ákep soqqan) kináli dep tanylyp, tórt jylǵa bas bostandyǵynan aiyryldy», – dep habarlady Bas áskeri prokýratýra.
Úkim ázirge zańdy kúshine engen joq.
