Táýelsizdiktiń 30 jyldyq merekesinde jetisýlyqtar qonystoı qýynyshyna keneldi. Taldyqorǵanda «Shańyraq» baǵdarlamasymen 60 páterlik úı qoldanysqa berildi. Jańa úıdiń mańyna barlyq áleýmettik nysandar jaqyn ornalasqan. Qalalyqtardy qos qýanyshymen qala ákimi Erjan Jasybaev quttyqtady, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.

5 qabatty jańa úı oblys ortalyǵynyń ońtústik-batys turǵyn úı massıvindegi 6 shaǵyn aýdanda ornalasqan. Jobanyń jalpy quny 860 mln teńgeden asady. Barlyq aýmaǵy abattandyrylǵan, serýendeýge arnalǵan, jáne balalar oıyn alańy bar.

Jańa baspanaǵa ıe bolǵandar qatarynda halyqtyń áleýmettik áljýaz toptarynyń ókilderi, búdjettik uıymdardyń qyzmetkerleri bar. Kópten kútken páter kiltterin qolyna alǵan turǵyndar qýanyshyn jasyrmaı bir-birine quttyqtaý tilekterin bildirip, jańa baspanaǵa shashý shashty.

Qonystoı qýanyshyna kenelgen azamattardyń biri Arnur Serikuly óz áserin bólisip:

- Men kezekte 7 jyldaı turdym. Otbasym bar, 2 bala tárbıelep otyrmyz. Búgin «Shańyraq» baǵdarlamasynyń arqasynda 2 bólmeli páter alyp otyrmyn. Táýelsizdiktiń 30 jyldyǵy merekesinde osyndaı jaqsylyqqa jetip otyrǵanymyzǵa qýanyshtymyn, endi óz baspanam bar. Barlyq turǵyn úı alǵan azamattardy qos merekesimen shyn júrekten quttyqtaımyn,- dedi ol.

Jalpy bul turǵyn úıdiń qurylysy 2020 jyldyń mamyr aıynda bastalǵan bolatyn. Úıdiń jalpy alańy 5106 sharshy metrden asady. Bas merdiger – «SA NIPI TransNeft».