Eskertkish birneshe steladan turady. Qara mramor postamentterde «Semei iadrolyq synaq poligony qurbandaryna», «Chernobyl apaty qurbandaryna» dep oiyp jazylǵan.
Kópshilik qaýymnyń aldynda sóz sóilegen Taldyqorǵan qalasynyń ákimi Ernat Bázil osydan 37 jyl buryn Chernobyldaǵy radiaktivti zaqymdaný aýmaǵynda 23 myńnan astam qazaqstandyq bolǵanyn tilge tiek etip, solardyń ishinde jetisýlyqtardyń da bolǵanyn atap ótti.
– Asa qaýipti ekenine qaramastan, olar erlik kórsetip, qaisarlyq tanytty. Ókinishke qarai olardyń kópshiligi búgin aramyzda joq. Biraq olardyń erteńgi urpaq úshin jasaǵan qaharmandyq isteri bizdiń jadymyzda máńgi qalady, – dedi qala ákimi.
Áskeri garnizonnyń úrmeli orkestri Memlekettik gimndi oryndalyp, eskertkishtiń aq jabyny túsirildi. Qurbandardyń qurmetine avtomattan úsh ret tóbege oq atyldy. Qala ákimi E.Bázil, «Semei – Chernobyl» múgedekteri men ardagerleri qoǵamdyq birlestiginiń jetekshisi Rahat Aqjoltaev, qalalyq máslihat tóraǵasy Temirbolat Ahajan memorialǵa gúl shoqtaryn qoidy. Jurtshylyq qurbandardy bir minýtpen únsizdikpen eske aldy.
Budan ári jiyn Oqýshylar saraiynyń májilis zalynda Semei iadrolyq synaǵy men Chernobyl apatynyń qurbandaryna arnalǵan eske alý sharasymen jalǵasty.
Semei poligonynyń múgedekteri men ardagerleri QB tóraǵasy Tolybek Danabekov jáne «Qazaqstannyń Chernobyl ardagerleri» qaýymdastyǵynyń ortalyq keńesiniń tóraǵasy Mustafa Hýsaiyn da quttyqtaý sóz sóiledi. Is-shara qonaqtarynyń kópshiligi qaýymdastyqtyń Qurmet gramotalarymen jáne tósbelgilerimen marapattaldy. Saltanatty kontserttik baǵdarlama qorytyndylady.
Chernobyl apatynyń saldaryn joiýǵa qatysqandardyń biri Qońyratbek Jolbosynovtyń aitýynsha, alǵashqy shaqyrý kezinde 1986 jyldyń qysynda Taldyqorǵannan Ýkrainaǵa 100-ge jýyq adam attanypty.
– Qańtarda biz belgilengen orynǵa jettik. Janymdaǵy birneshe jigittermen birge meni de 22-shi Prikarpat brigadasyna jiberdi, 1987 jyldyń kókteminde 34 kún apat bolǵan orynda, qiraǵan reaktordyń mańynda boldyq. Búgin sol 100 shaqty adamnan tek 15 adamdai barmyz. Ózim himik-dozimetrist bolsam da, ziian-qaýpi týraly kóp oilamadym. Biz ondai qaterli iske Otan úshin bardyq. Sony bizdiń urpaqtarymyzdyń bilip júrgeni jón, – deidi chernobyldyq ardager.
