Atalmysh forým biyl da óz jalǵasyn taýyp, kieli Jetisý jerinde uiymdastyryldy.
Forýmnyń ashylý saltanatyna Qyrǵyz Respýblikasynyń Qazaqstan Respýblikasyndaǵy Tótenshe jáne Ókiletti Elshisi Jeenbek Kýlýbaev, Qyrǵyz Respýblikasy Prezidentiniń keńesshisi Sýltan Raev, Qazaqstan Jazýshylar Odaǵynyń tóraǵasy Ulyqbek Esdáýlet, tarih ǵylymdarynyń doktory, professor, QR UǴA akademigi Mámbet Qoigeldiev jáne oblys ákimi Amandyq Ǵabbasuly qatysty. Sonymen qatar jiynǵa elshiler men diplomattar, kórnekti ǵalymdar men aqyn-jazýshylar, belgili memleket jáne qoǵam qairatkerleride arnaiy keldi.
Kezdesý barysynda eki el arasyndaǵy yntymaqtastyq qarym-qatynasty odan ári nyǵaitý, saýda-ekonomikalyq, mádeni-gýmanitarlyq, týristik salalardy damytý jóninde áńgime órbidi.
Aldymen sóz Qyrǵyz Respýblikasynyń Qazaqstandaǵy Tótenshe jáne Ókiletti Elshisi Jeenbek Kýlýbaevke berildi.
Alyp Alataýdyń arǵy-bergi betin en jailaǵan qazaq pen qyrǵyz ejelden órisi bir baýyrlas halyq. Ózderińiz bilesizder, búginde týrizmdi damytýǵa múmkindikter qarastyrylýda. Ystyqkólge Almaty oblysynan adam kóp keledi. Demalýshylarǵa óz alǵysymyzdy bildiremiz. Qazaqstandyq týristerge esigimiz árdaiym ashyq. Qos eldiń tabiǵaty da bir-birine uqsaidy. Bul týrizmdi, ásirese aýyl, sonyń ishinde, mal sharýashylyǵyn damytýǵa erekshe septigin tigizýde. Sondyqtan, sizdermen birlese jumys istep, yntymaqtastyǵymyzdy órkendetýge ázirmiz», -dep túiindedi.
Úshinshi forýmnyń Taldyqorǵan qalasynda ótkizilýiniń de ózindik tarihi sebebi bar. Qyrǵyzdyń barsha álemdi tańqaldyrǵan uly «Manas» eposy barlyq túrki halyqtary úshin, onyń ishinde qyrǵyz ben qazaq úshin erekshe mura ekendigi aitpasa da túsinikti.
Qazaqtyń uly ǵalymy Shoqan Ýálihanov 1856 jyly «Manas» eposyn tuńǵysh ret qaǵazǵa túsirdi. Aradan ǵasyr ótkennen keiin, 1952 jyly qazaqtyń uly jazýshysy Muhtar Áýezov «Manas» eposyn eskiniń qaldyǵy dep qaralaýshylardan qorǵap qaldy. Uly Muhtar men onyń izbasar inisi, uly qalamger Shyńǵys Aitmatovtyń aǵa-iniliginiń, uly dostyǵynyń dánekerine ainalǵan «Manas» eposyna búgingi forýmnyń arnalýy eki halyqtyń arasyndaǵy dostyqtyń da simvoly ispettes.
Osy oraida biylǵy alqaly basqosýdy uiymdastyra otyryp, baýyrlas eki el arasyndaǵy ádebi jáne mádeni bailanystardy jandandyrýǵa qomaqty úles qosqan Almaty oblysynyń ákimi Amandyq Ǵabbasuly Battalovqa sóz berildi.
Eki kúnge josparlanǵan forým Almaty oblysynyń Kerbulaq aýdanynda jalǵasty. Shoqan máńgilik tynys tapqan mekende meimandardy Almaty oblysy ákiminiń orynbasary Aqan Ábdýáliev pen Kerbulaq aýdanynyń ákimi Mahabbat Bigeldiev kútip aldy. Eki el ziialylarynyń toby osy óńirde Shoqan Ýálihanovtyń memorialdyq keshenine táý etip, «Manas» festivaline qatysty. Festivalde qazaq-qyrǵyz jyrshylary «Manas» jyryn jatqa aitýdan jarysqa tústi.
Aita ketý kerek, qazaq-qyrǵyz ziialylarynyń forýmy dástúrli túrde jyl saiyn Halyqaralyq Túrki akademiiasynyń uiytqy bolýymen uiymdastyrylýda. Atalǵan forýmnyń alǵashqysy Halyqaralyq Túrki akademiiasynyń uiymdastyrýymen 2018 jyldyń 25 sáýirinde Astana qalasynda «Aitmatov taǵylymy» degen ataýmen ótkizilgen bolatyn. Al eki el ziialylarynyń kelesi forýmy Ystyqkól jaǵalaýynda ótetin bolady.
Baljan Jumanbekova
