Marapattaý rásiminde oblys ákimi Qanat Bozymbaev óńirdiń damýyna úles qosyp júrgen jýrnalister qaýymyn quttyqtap, eńbekterine tabys tiledi:
– Sizder, jýrnalister, qoǵamdyq ómirdegi mańyzy erekshe ári jaýapkershiligi mol kásiptiń iesisizder. Ýaqytpen sanasýdy bilmeitin, ózekti máselelerdiń, tótenshe oqiǵalardyń bel ortasynda júretin tilshilerdiń eńbegi árdaiym baǵalaýǵa laiyq. Táýelsiz Qazaqstannyń, sonyń ishinde Almaty oblysynyń da mereili sharalary, ósý kezeńderi buqaralyq aqparat quraldarynda úzdiksiz jaryq kórip keledi. Obektivti bailanys arnasy bola otyryp, sizder halyqty ǵana emes, oblys basshylyǵyn da aqparattarmen habardar etip otyrsyzdar, sóitip bizge turǵyndardyń ózekti máselelerin sheshýge kómek etip kelesizder. Sondyqtan jýrnalisterdi Jetisý aimaǵyn damytý jolynda árdaiym senimdi áriptes sanaimyn. «Samǵaý» baiqaýy – jaqsy dástúr. Degenmen kelesi jyly konkýrsty uiymdastyrýda jańashyldyq engizip, syilyq kólemin ulǵaitýǵa ýáde beremin. El Táýelsizdiginiń mereili 30 jyldyǵyndaǵy sizder úshin bul marapattyń orny erekshe bolady dep oilaimyn, – dedi Qanat Bozymbaev. Budan ári marapattaý rásimi atqaryldy.
Jalpy bul baiqaý biyl 5-shi ret ótkizilip otyr. Baiqaýǵa 120-dan astam ótinish kelip túsken. Sonyń ishinde BAQ-tyń 33 ókili qara úzip shyqty. Birinshi oryn iegerleri retinde «Kerbulaq juldyzy» gazetinen Azamat Aqylbekov, «Zaman jarshysy» basylymynyń tilshisi Burym Orynbasar, «Jetisý» telearnasynyń qyzmetkerleri – redaktor Jadyra Maratova, operator Rizat Qydyralin, prodiýsser Ádilbek Abilov, ardager fotograf Nurmanbet Qizatuly, «Egemen Qazaqstan» internet saitynyń redaktory Dinar Kerim, «Karasayinfo.kz» jelilik basylymynyń redaktory Atlana Isaeva, «Jetisý» gazetiniń dizaineri Saqyp Tókeeva, bloger, Panfilov aýdany ákiminiń baspasóz hatshysy Nurbol Qanaǵat marapattaldy. Júldegerlerdiń bárine arnaiy statýetkalar, diplomdar men aqshalai syilyqtar berildi. «Oblys jýrnalistikasy salasyna qosqan úlesi úshin» nominatsiiasyn «Ogni Alataý» gazetiniń bas redaktory Atsalim Idigov ielenip, jýrnalister atynan rizashylyq tilegin bildirdi.
Beisen Quranbek atyndaǵy júldeniń iegeri, jýrnalistikada 30 jylǵa jýyq eńbek ótili bar jýrnalist Gúljanat Maquljanova óziniń tolqynysty áserin jasyrǵan joq:
– Beisen Quranbekpen kózi tirisinde áriptes, syilas, zamandas boldyq. Beisenniń atyndaǵy nominatsiianyń tuńǵysh iegeri bolý - men úshin bir jaǵynan qýanysh, ekinshiden, úlken jaýapkershilik. Ol bizge ári basshy ári tálimger boldy. Salmaqty jobalardy, túrli filmder men habarlardy birge jasadyq. Onyń senim artqany meni únemi alǵa jeteleitin. «Samǵaý» baiqaýyna Beisen Quranbek atyndaǵy nominatsiianyń qosylǵany – bárimiz úshin de zor mártebe, – dedi G.Maquljanova.
